မြန်မာဂျာနယ်လစ်နှစ်ဦးကို သူလျှိုမှုဖြင့် ဘင်္ဂလားဒေ့ရှ် ဖမ်းဆီးထား

စက်တင်ဘာ ၁၅၊ ၂၀၁၇
M-Media

ခွန်လတ်(၀ဲ) နှင့် မင်းဇေယျာဦး (ညာ) (Photo credit – Coconut Yangon)

– ရိုဟင်ဂျာကိစ္စ သတင်းယူဖို့ ရောက်ရှိနေတဲ့ မြန်မာနိုင်ငံသား သတင်းထောက်နှစ်ဦးကို သူလျှိုလုပ်တယ်ဆိုတဲ့ သံသယနဲ့ ဘင်္ဂလားဒေ့ရ်ှက ဖမ်းဆီး တရားစွဲဆိုထားတယ်လို့ သိရပါတယ်။

ဂျာမနီမဂ္ဂဇင်းတစ်ခုအတွက် တာဝန်ထမ်းဆောင်နေတဲ့ မင်းဇေယျာဦးနဲ့ ခွန်လတ်တို့ဖြစ်ပြီး ရခိုင်ပြည်နယ်က မတည်ငြိမ်မှုတွေကြောင့် ရိုဟင်ဂျာဒုက္ခသည်တွေ ထွက်ပြေးရတဲ့ ကော့ဇ်ဘဇယားမှာ လွန်ခဲ့တဲ့ တစ်ပတ်ကျော်က ဖမ်းဆီးခံလိုက်ရတာပါ။

သူတို့နှစ်ဦးအတွက် လိုက်ပါဆောင်ရွက်ပေးနေတဲ့ ဘင်္ဂလားဒေ့ရှ် ရှေ့နေက သူ့အမှုသည်တွေဟာ ဂျာနယ်လစ်ဗီဇာအစား အလည်အပတ်ဗီဇာနဲ့ နိုင်ငံအတွင်း ၀င်ရာက်ခဲ့တယ်လို့ စွပ်စွဲခံရပြီး ‘အတုအပပြုလုပ်ခြင်း’ ‘အချက်အလက်မှားယွင်းခြင်း’ စတဲ့ ပုဒ်မတွေနဲ့ တရားစွဲဆိုခံထားရတယ်လို့ ပြောကြားခဲ့ပါတယ်။

ကော့ဇ်ဘဇားက ရဲချုပ် ရန်ဂျစ် ကူးမားရ် ဘာရူက အဲဒီ ဂျာနယ်လစ်နှစ်ယောက်ကို အဓိက ‘သူလျှိုမှု’ နဲ့ ဖမ်းဆီးခဲ့တာဖြစ်တယ်လို့ ဆိုပါတယ်။

“သူတို့ဟာ မြန်မာနိုင်ငံအတွက် ရိုဟင်ဂျာတွေဆီကနေ သတင်းအချက်အလက်တွေ ရယူနေပါတယ်” လို့ ကူးမားရ်က ပြောပါတယ်။

ဘင်္ဂလားဒေ့ရ်ှက ဆုရ ဓာတ်ပုံဂျာနယ်လစ်တစ်ဦးလည်း မြန်မာ သတင်းသမားနှစ်ဦးနဲ့အတူ ဖမ်းဆီးခံခဲ့ရပေမယ့် နောက်ပိုင်းမှာ ပြန်လွတ်လာပါတယ်။

ရိုဟင်ဂျာဒုက္ခသည်တွေ ဘင်္ဂလားဒေ့ရ်ှကို ထွက်ပြေးလာကြပြီးတဲ့နောက်ပိုင်း နိုင်ငံတကာက ဂျာနယ်လစ်တွေဟာ ဘင်္ဂလားဒေ့ရ်ှနယ်စပ်ကို စုပြုံရောက်ရှိလာခဲ့ကြပါတယ်။

မင်းဇေယျာဦးနဲ့ ခွန်လတ်တို့ဟာ ဟမ်းဘတ်အခြေစိုက် Geo အတွက် ရိုဟင်ဂျာ ဒုက္ခသည်တွေအရေး သတင်းပေးပို့ဖို့ စက်တင်ဘာလအစောပိုင်းမှာ ကော့ဇ် ဘဇားကို ရောက်ရှိလာတာပါ။

ဒီလို ဖမ်းဆီးထားမှုကို ဘင်္ဂလားဒေ့ရ်ှက ဗုဒ္ဓဟူးနေ့မှ ကြေငြာတာဖြစ်ပြီး၊ မနေ့က ရုံးတင်ခဲ့ပါတယ်။ ဂျာနယ်လစ်နှစ်ဦးအတွက် အာမခံလျှောက်ထားမှုကို တရားရုံးက ပယ်ချခဲ့တယ်လို့ ရှေ့နေ Jyotirmoy Barua က ပြောပါတယ်။

Ref: Yahoo