ဘိုကိုဟရမ်လက်မှ ဓားစားခံများကယ်ထုတ်ရေးကြိုးပမ်းသူ နိုက်ဂျီးရီးယားရှေ့နေကို ကုလ ဂုဏ်ပြု

စက်တင်ဘာ ၁၈၊ ၂၀၁၇
M-Media

၎င်း၏ ပညာဒါန စာသင်ကျောင်းရှေ့တွင် တွေ့ရသည့် မူစတာဖာ

– ဘိုကိုဟရမ် အကြမ်းဖက်အဖွဲ့က ပြန်ပေးဆွဲသွားခဲ့တဲ့ ကျောင်းသူတွေ ပြန်လည်လွတ်မြောက်လာရေး ကြိုးပမ်းပေးခဲ့တဲ့ နိုက်ဂျီးရီးယားရှေ့နေတစ်ဦးဟာ ကုလရဲ့ ထိပ်တန်းဂုဏ်ပြုဆုတစ်ခု ရရှိခဲ့ပါတယ်။

ဇန်နာ မူစတာဖာဆိုသူဖြစ်ပြီး ကုလသမဂ္ဂ ဒုက္ခသည်များဆိုင် မဟာမင်းကြီးရုံး (UNHCR) က ချီးမြှင့်တဲ့ Nansen Refugee Award ဆုကို ရရှိကြောင်း ကုလက ဒီနေ့မှာ ကြေငြာခဲ့ပါတယ်။

၂၀၁၄ ခုနှစ်က နိုက်ဂျီးယားနိုင်ငံမြောက်ပိုင်း ချီဘွတ်မြို့မှာ ကျောင်းသူ ၂၀၀ ကျော်ကို ဘိုကိုဟရမ် အကြမ်းဖက်အဖွဲ့က ပြန်ပေးဆွဲသွားခဲ့တာဖြစ်ပြီး ဒီကျောင်းသူထဲက ၁၀၀ ကျော် လွတ်မြောက်ရေး မူစတာဖာက ကြားဝင်ညှိနှိုင်းပေးခဲ့ပါတယ်။

ဒါတင်မကဘဲ မူစတာဖာဟာ ပညာဒါန စာသင်ကျောင်းနှစ်ခုကို ဖွင့်လှစ်ထားပြီး ကျောင်းသူကျောင်းသားတွေကို အစားသောက်ကျွေးမွေးတာ၊ ကျန်းမာရေးစစ်ဆေးပေးတာတွေလည်း သူ့ကျောင်းမှာ လုပ်ဆောင်ပေးပါတယ်။ Nansen Refugee Award ဆုအတွက် ဆုကြေးဟာ ကန်ဒေါ်လာ တစ်သိန်းခွဲဖြစ်ပါတယ်။

“အရမ်းပျော်ရွှင်ပြီး ဒီဆုက ကျွန်တော့အတွက် တွန်းအားတစ်ခုပါပဲ။ ကျွန်တော့်ရဲ့ ကြိုးပမ်းမှုတွေကို တိုးမြှင့်သွားမှာပါ။ ကျွန်တော့်ကျောင်းမှာ တက်ခဲ့တဲ့ ကျောင်းသားတစ်ချို့ဆိုရင် ဘွဲ့တွေဘာတွ ရသွားကြပြီ။ တစ်ချို့တွေက တက္ကသိုလ်တက်နေပါတယ်။ ဒီဆုကြေးကို သူတို့လေးတွေဘ၀အတွက် အသုံးပြုသွားမှာပါ” လို့ မူစတာဖာက ပြောကြားခဲ့ပါတယ်။

Future Prowess ဆိုတဲ့ သူ့ရဲ့ အခမဲ့ စာသင်ကျောင်းကို လွန်ခဲ့တဲ့ ၁၀ စုနှစ်အရင်က ဖွင့်ထားတာဖြစ်ပြီး ဘိုကိုဟရမ်တွေ ၂၀၀၉ ခုနှစ်မှာ ထကြွပြီးနောက်ပိုင်း နိုင်ငံမြောက်ဖက် ဘိုနိုပြည်နယ်မှာ လက်ရှိအချိန်အထိ ဖွင့်လှစ်ထားနိုင်တဲ့ တစ်ခုတည်းသော စာသင်ကျောင်းဖြစ်ပါတယ်။

UNHCR အကြီးအကဲ ဖိလစ်ပို ဂရန်ဒီကလည်း မူစတာဖာရဲ့ ငြိမ်းချမ်းရေး မြှင့်တင်ပေးမှု၊ အကြမ်းဖက်မှုကြောင့် ပျက်ဆီးနေနဲ့ လူ့အဖွဲ့အစည်းကို ပြန်လည်တည်ဆောက်မှုတို့အတွက် ချီးကျူးခဲ့ပါတယ်။

Ref: Reuters