မြောက်ကိုရီးယားကို စစ်တိုက်ရန် ပြင်ဆင်ထားသည်ဟု ထရမ့်ပြော

စက်တင်ဘာ ၂၇၊ ၂၀၁၇
M-Media

– မြောက်ကိုရီးယားအား စစ်ရေးအရ အရေးယူရန် အလုံးစုံ ပြင်ဆင်ထားပြီးဖြစ်သည်ဟု အမေရိကန်သမ္မတ ဒေါ်နယ်ထရမ့်က ကြေငြာလိုက်ပြီး တိုက်ခိုက်မှုဖြစ်ပါက အကြီးအကျယ် ပျက်ဆီးလိမ့်မည်ဟု ဆိုသည်။

ထရမ့်၏ Twitter ရေးသားချက်တစ်ခုကို ကိုးကား၍ အမေရိကန်မှာ မိမိတို့အား စစ်ကြေငြာခဲ့သည်ဟု မြောက်ကိုရီးယားက တနင်္လာနေ့တွင် ပြောကြားခဲ့ပြီး အမေရိကန် ဗုံးကြဲလေယာဉ်များကို ပစ်ချမည်ဆိုသည့် စကားကို ထရမ့်က ယခုကဲ့သို့ တုန့်ပြန်လိုက်ခြင်းဖြစ်သည်။

“ဒုတိယရွေးချယ်မှုအတွက် ကျွန်တော်တို့ အားလုံး ပြင်ဆင်ပြီးပါပြီး။ ဒါဟာ ကျွန်တော်တို့ ကြိုက်တဲ့ ရွေးချယ်မှု မဟုတ်ပါဘူး။ ဒါပေမယ့် ဒီနည်းလမ်းကို ကျွန်တော်တို့သုံးရင် အကြီးအကျယ် ပျက်ဆီးမှာ ဖြစ်ပါတယ်။ ပြောနိုင်တာက မြောက်ကိုရီးယားဟာ အကြီးအကျယ် ပျက်ဆီး ဆုံးရှုံးမှာပါ။ ဒါဟာ စစ်ရေးနည်းလမ်းဖြစ်ပြီး လုပ်ဖို့လိုရင် ကျွန်တော်တို့ လုပ်မှာပါ” ဟု ထရမ့်က ယမန်နေ့တွင် အိမ်ဖြူတော်၌ ပြောကြားခဲ့သည်။

အမေရိကန်က စစ်ကြေငြာသည်ဆိုသည့် မြောက်ကိုရီးယား၏ စွပ်စွဲချက်ကို အိမ်ဖြူတော်က စောစောပိုင်းတွင် ငြင်းဆိုခဲ့ပြီးနောက်ပိုင်း ထရမ့်၏ ယခုမှတ်ချက် ထွက်လာခဲ့ခြင်းဖြစ်သည်။

မြောက်ကိုရီးယားပြဿနာကို မဖြေရှင်းနိုင်ခဲ့သည့် ယခင် အစိုးရများကိုလည်း ထရမ့်က အပြစ်တင်ခဲ့သည်။

တောင်ကိုရီးယားထောက်လှမ်းရေးဌာန (NIS) က မြောက်ကိုရီးယားမှာ ၎င်းတို့၏ စစ်လေယာဉ်များကို အရှေ့ဖက်ကမ်းရိုးတန်းတွင် ပြောင်းရွှေ့ နေရာချထားနေပြီး ကမ်းရိုးတန်း ခံစစ်ကို တိုးမြှင့်ထားသည်ဟု ပြောကြားခဲ့သည်။

ဒေသတွင်း ခေါင်းဆောင်များကလည်း ကိုရီးယားကျွန်းဆွယ်တွင် စစ်ဖြစ်ပါက ဆိုးရွားသည့် အကျိုးဆက်များ ဖြစ်လာမည်ဟု သတိပေးထားသည်။

Ref: Aljazeera