ယူအေအီးတွင် အင်္ဂါဂြိုဟ်ပုံတူ သိပ္ပံမြို့တော် တည်ဆောက်မည်

စက်တင်ဘာ ၃၀၊ ၂၀၁၇
M-Media

သိပ္ပံမြို့တော် ဒီဇိုင်း

– အင်္ဂါဂြိုဟ်ပေါ်မှာ ကြုံတွေ့ရမယ့် အခြေအနေတိုင်း ဖန်တီးထားမယ့် သိပ္ပံမြို့တော်တစ်ခု တည်ဆောက်သွားမယ်လို့ အာရပ်စော်ဘွားများပြည်ထောင်စု (ယူအေအီး)နိုင်ငံက ကြေငြာလိုက်ပါတယ်။

စကွဲယားမီတာ ၁.၉ သန်းအကျယ်အ၀န်းမှာ တည်ဆောက်မယ့် ဒီ သိပ္ပံမြို့တော်ကို Mars Science City လို့ အမည်ပေးထားပြီး ဒီရ်ဟမ် သန်း ၅၀၀ သုံးစွဲမှာဖြစ်တယ်လို့ ယူအေအီး ၀န်ကြီးချုပ် ရှိခ် မိုဟာမက် ဘင် ရာရှစ် အလ် မခ်တွမ်က အင်္ဂါနေ့မှာ ပြောကြားခဲ့ပါတယ်။

ဒီမြို့တော် တည်ဆောက်ရေးလုပ်ငန်းဟာ ၂၁၁၇ ခုနှစ်မှာ အင်္ဂါဂြိုဟ်ကို လူလွှတ်နိုင်ရေး ယူအေအီးရဲ့ စီမံကိန်း အစိတ်အပိုင်းတစ်ခုဖြစ်ပြီး အင်္ဂါဂြိုဟ်ပေါ်မှာ နေထိုင်တဲ့အခါ ကြုံတွေ့ရမယ့် အခြေအနေအတိုင်း အတိအကျ ဖန်တီးထားမှာပါ။

ဒါဟာ အင်္ဂါဂြိုဟ်ပေါ် လူသားနေထိုင်ဖို့ စမ်းသပ်မှုအတွက် နောက်ထပ်နှစ် ၁၀၀ အတွင်း တစ်ခုတည်းသောပုံတူ ဖြစ်လာမှာဖြစ်ပါတယ်။ ဒီသိပ္ပံမြို့တော်မှာ လူငယ်တွေ ပညာဆည်းပူးနိုင်မယ့် နေရာတွေကိုလည်း ထည့်သွင်းပေးထားမှာပါ။

“ဒီစီမံကိန်းသစ်ဟာ ကမ္ဘာ့သိပ္ပံဆိုင်ရာ ဆောင်ရွက်မှုတွေမှာ ယူအေအီးရဲ့ ဦးဆောင်ကူညီမှုအတွက် နောက်ထပ် ခြေလှမ်းတစ်ခုပါ။ လူသားတွေရဲ့ အာကာသခရီး ချီတက်မှုမှာ ပါဝင်ဖို့၊ ကူညီဖို့အတွက် နမူနာတစ်ခု၊ လှုံ့ဆော်မှုတစ်ခု ဖြစ်လာဖို့ ကျွန်တော်တို့ ဆောင်ရွက်တာဖြစ်ပါတယ်” လို့ ၀န်ကြီးချုပ်က ပြောကြားခဲ့ပါတယ်။

အင်္ဂါဂြိုဟ်ရဲ့ ကြမ်းတမ်းတဲ့ မြေအနေအထား၊ ပြင်းထန်တဲ့ ရာသီဥတုတွေကို 3D Printing နည်းပညာနဲ့ ပုံတူဖန်တီးနိုင်မယ့် ဓာတ်ခွဲခန်းတွေ ပါဝင်မှာဖြစ်ပြီး၊ အင်္ဂါဂြိုဟ်မှာ တွေ့ကြုံရမယ့်အခြေအနေအတွက် အဲဒီမြို့တော်မှာ သိပ္ပံပညာရှင် အဖွဲ့တစ်ခုက တစ်နှစ်ကြာ နေထိုင်မယ့် အစီအစဉ်တစ်ခုလည်း ရှိနေပါတယ်။

Mars Science City ဟာ ကမ္ဘာတစ်ဝှမ်းက အာကာသသိပ္ပံပညာရှင်တွေ၊ အာကာသချစ်သူတွေကို စွဲဆောင်သွားနိုင်ဖို့အတွက် ယူအေအီးက ရည်ရွယ်ထားပြီး၊ အင်္ဂါဂြိုဟ်ရဲ့ တကယ့် အခြေအနေအတိုင်း ဖန်တီးထားမယ့် ကမ္ဘာ့ အဆန်းသစ်ဆုံး အဆောက်အဦး ဖြစ်လာမှာဖြစ်ပါတယ်။

Ref: Alarabiya