ပြင်သစ်နိုင်ငံ မာဆေးလ်မြို့ ဘူတာရုံတွင် ဓားဖြင့်တိုက်ခိုက်မှု ဖြစ်ပွား

အောက်တိုဘာ ၁၊ ၂၀၁၇
M-Media

ဘူတာရုံရှေ့မှ ရဲတပ်ဖွဲ့ဝင်တစ်ဦး

– ပြင်သစ်နိုင်ငံ မာဆေးလ်မြို့ရှိ ရထားဘူတာတွင် ဓားဖြင့်တိုက်ခိုက်မှုတစ်ခု ဖြစ်ပွားခဲ့ပြီး အမျိုးသမီးတစ်ဦး အပါအ၀င် လူ ၂ ဦး သေဆုံးခဲ့သည်ဟု ပြင်သစ် ပြည်ထဲရေးဝန်ကြီးဌာနက သတင်းထုတ်ပြန်ခဲ့သည်။

မာဆေးလ်၏ အဓိက ရထားဘူတာဖြစ်သော စိန့်ချားလ်စ်ဘူတာတွင် ဒေသစံတော်ချိန် ယနေ့ နေ့လည် ၂ နာရီဝန်းကျင်ခန့်တွင် ဖြစ်ပွားခဲ့ခြင်းဖြစ်ပြီးတိုက်ခိုက်သူကို အသေပစ်သတ်ခဲ့သည်ဟု ရဲတပ်ဖွဲ့က ပြောကြားခဲ့သည်။

တိုက်ခိုက်သူမှာ အသက် ၂၅-၃၀ ၀န်းကျင်ရှိနပြီး ၎င်းထံတွင် မည်သည့် အထောက်အထား စာရွက်စာတမ်းမှ ပါဝင်ခြင်းမရှိဟု ဆိုသည်။

လက်ရှိတွင် ထိုအဖြစ်အပျက်အတွက် အကြမ်းဖက်တိုက်ဖျက်ရေးအဖွဲ့က စုံစမ်းစစ်ဆေးနေပြီး၊ ရထားဘူတာတစ်ဝိုက် မသွားရန်၊ ထိုဘူတာကို အသုံးပြု၍ ခရီးသွားရန် စီစဉ်ထားမှုများကို ဖျက်သိမ်းရန် ရဲတပ်ဖွဲ့က ပြည်သူများအား အကြံပြုထားသည်။

၂၀၁၅ ခုနှစ် ဇန်န၀ါရီလက ချာလီဟဘ်ဒို မဂ္ဂဇင်းတိုက်အား သေနတ်သမားများက ၀င်ရောက်ပစ်ခတ်ကာ လူ ၁၂ ဦး သေဆုံးခဲ့ပြီးနောက်ပိုင်း ဆက်တိုက် ဖြစ်ပွားခဲ့သည့် အကြမ်းဖက်တိုက်ခိုက်မှုများကြောင့် ပြင်သစ်နိုင်ငံတစ်ဝှမ်း လုံခြုံရေးကို အမြင့်ဆုံး မြှင့်ထားသည့်အချိန်တွင် ယခုတိုက်ခိုက်မှု ပေါ်ပေါက်လာခြင်းဖြစ်သည်။

Ref: Aljazeera