ကမ္ဘာ့ဖလာခြေစစ်ပွဲအောင်မြင်သည့် လက်ရွေးစင်အသင်းကို အီဂျစ်သမ္မတ ဆုချမည်

အောက်တိုဘာ ၉၊ ၂၀၁၇
M-Media

– ၂၀၁၈ ခုနှစ် ကမ္ဘာ့ဖလား ခြေစစ်ပွဲ အောင်မြင်ခဲ့သည့် အီဂျစ်ဘောလုံးအသင်း၏ အသင်းသားတိုင်းကို တစ်ဦးလျှင် အီဂျစ်ပေါင် ၁.၅ သန်း (ကန် ၈၄၉၀၀ ဒေါ်လာ) ချီးမြှင့်သွားမည်ဟု အီဂျစ်သမ္မတ အဘ်ဒဲလ် ဖာတာ အလ်-စီစီက ပြောကြားလိုက်သည်။

အီဂျစ်အသင်းမှာ ယမန်နေ့က ကွန်ဂိုအသင်းနှင့် ကစားခဲ့သည့်ပွဲတွင် ၂ ဂိုး ၁ ဂိုးဖြင့် အနိုင်ရခဲ့ပြီး ၁၉၉၀ ပြည့်နှစ်နောက်ပိုင်း ပထမဆုံးအကြိမ်အဖြစ် ကမ္ဘာ့ဖလားခြေစစ်ပွဲ အောင်မြင်ခဲ့သည်။

အလ်-စီစီက ထိုအောင်မြင်မှုအတွက် ပျော်ရွှင်မိသည်ဟု ပြောကြားခဲ့ပြီး အီဂျစ်ဘောလုံးအသင်းနှင့် ပြည်သူများကိုလည်း ချီးကျူးခဲ့ကာ ယနေ့တွင် ဘောလုံးအသင်းကို တွေ့ဆုံဂုဏ်ပြုရန် ရှိနေသည်။

“သူရဲကောင်းဆန်ဆန် စွမ်းဆောင်ရည်နဲ့ ကမ္ဘာ့ဖလား ခြေစစ်ပွဲအောင်တဲ့အတွက် လက်ရွေးစင်အသင်းကို ကျွန်တော် ဂုဏ်ပြုချင်ပါတယ်။ ‘အီဂျစ်တည်တံ့ပါစေ’ ဆိုတဲ့ သူတို့ရဲ့ ဟစ်အော်အားပေးမှုနောက်ပိုင်း ပေါ်ပေါက်လာတဲ့ ဒီအောင်မြင်မှုအတွက် အီဂျစ်ပြည်သူတွေကိုလည်း ကျွန်တော် ဂုဏ်ပြုပါတယ်” ဟု အလ်-စီစီက ၎င်း၏ ဆိုရှယ်မီဒီယာ စာမျက်နှာတွင် ရေးသားခဲ့သည်။

အီဂျစ်သမ္မတမှာ လက်ရွေးစင်အသင်း ကစားသမား တစ်ဦးစီတိုင်းကို အီဂျစ်ပေါင် ၁.၅ သန်း (ကန် ၈၄၉၀၀) ချီးမြှင့်မည်ဟုလည်း ပြောကြားခဲ့သည်။

Ref: Alarabiya