ဝန်ကြီးချုပ်နှုတ်ထွက်ရေး မလေးပြည်သူသောင်းချီ ဆန္ဒပြ

အောက်တိုဘာ ၁၅၊ ၂၀၁၇

M-Media

– နိုင်ငံပိုင်လုပ်ငန်းမှ ဒေါ်လာ ဘီလီယံနှင့်ချီ အလွဲသုံးစားလုပ်မှုအပေါ် ၀န်ကြီးချုပ်နာဂျစ်ရာဇတ်အား အရေးယူရန်အတွက် ထောင်သောင်းချီသော မလေးရှားနိုင်ငံသားများမှာ ယမန်နေ့က ဆန္ဒပြခဲ့ကြသည်ဟု သိရသည်။

နာဂျစ်မှာ 1Malaysia Development Berhad (1MDB) လုပ်ငန်းမှ ငွေများကို ကိုယ်ကျိုးအတွက် သုံးစွဲခဲ့သည်ဆိုသော စွပ်စွဲမှုကို ပြီးခဲ့သည့်နှစ်ကတည်းက ခံခဲ့ရပြီး ၎င်းကမူ မည်သည့်အမှားမှ လုပ်ထားခြင်းမရှိဟု ပြောကြားခဲ့သည်။

ထိုကိစ္စဖြစ်ပွားပြီးနောက် နာဂျစ်မျာ ၎င်းနှင့် သဘောထားကွဲလွဲသူများ၊ မီဒီယာနှင့် တက်ကြွက်လှုပ်ရှားသူများအား နှိပ်ကွပ်မှုကို ဆက်တိုက်ပြုလုပ်လာခဲ့သည်။

ထို့ပြင် လူနေမှုစားရိတ်များ ကြီးမြင့်လာခြင်း၊ အခွန်များ များပြားလာခြင်းတို့ကလည်း နာဂျစ်အပေါ် လူထုထောက်ခံမှုကျဆင်းလာပြီး အတိုက်အခံများ၏ ဆော်သြမှုဖြင့် ပြည်သူလူထုက နာဂျစ်နှုတ်ထွက်ပေးရန် တောင်းဆိုလာခဲ့သည်။

ယမန်နေ့ဆန္ဒပြမှုမှာ အတိုက်အခံမဟာမိတ်အဖွဲ့ Pakatan Harapan (PH) က နာဂျစ်၏ အလွဲသုံးစားပြုမှုကို လူများစု မလေးလူမျိုးများ သိရှိရန် ရည်ရွယ်၍ ပြုလုပ်ခဲ့သည့် ၂ လတာ ချီတက်ဆန္ဒပြမှု၏ နောက်ဆုံးတစ်ခု ဖြစ်ပြီး ပြည်သူ ထောင်သောင်းချီ ပါဝင်ခဲ့သည်။

ဝန်ကြီးချုပ်ဟောင်းဖြစ်ပြီး နာဂျစ်အား သွန်သင်ပြသခဲ့သူဖြစ်သည့် ဒေါက်တာ မဟာသီယာ မိုဟာမက်က နာဂျစ်ကို ဆက်ထားလျှင် တိုင်းပြည်အတွက် ကောင်းလာမည်မဟုတ်ဟု ပြောကြားခဲ့သည်။

“အရင်ကမရှိခဲ့တဲ့ သူခိုးဝန်ကြီးချုပ်တစ်ယောက် ကျွန်တော်မှာ ရှိလာပြီ။ သူကတော့ ခိုးခိုးပြီး သာသာယာယာနေနိုင်တယ်။ ငါ့မင်းငါ့ချင်းဝါဒကို တိုင်းပြည်ကနေ ဖယ်ရှားဖို့ လိုလာပါပြီ။ နာဂျစ်ရဲ့ ကံကြမ္မာဟာ ကျွန်တော်တို့ရဲ့ လက်မှာ ရှိပါတယ်။ PH ကို မဲပေးပြီး သူ့ကို ဖြုတ်ချလို့ ရပါတယ်”

Ref: CNA