အကျိုးအမြတ်မယူသည့် ပညာရေးအဖွဲ့များကို ဂူးဂဲလ်က ဒေါ်လာ ၁ ဘီလီယံလှူမည်

အောက်တိုဘာ ၁၅၊ ၂၀၁၇
M-Media

– ကမ္ဘာတစ်ဝှမ်း ပညာရေးအဆင့်အတန်းကို မြှင့်တင်ရန် ကူညီသည့်အနေဖြင့် အကျိုးအမြတ်မယူသည့် ပညာရေးအဖွဲ့အစည်းများကို လာမည့်ငါးနှစ်အတွင်း ဒေါ်လာ သန်းတစ်ထောင် လှူဒါန်းမည်ဟု Google က ပြောကြားလိုက်ပြီး ၎င်း၏၀န်ထမ်းများကိုလည်း စေတနာ့ဝန်ထမ်းအဖြစ် နာရီတစ်သန်း အသုံးပြုခွင့်ပေးမည်ဟု ဆိုသည်။

ဂူဂဲလ်အမှုဆောင်ချုပ် စန်ဒါ ပီချိုင်က ပစ်တ်ဘာ့ဂ်မြို့၌ ကြာသပတေးနေ့က ပြောကြားခဲ့ခြင်းဖြစ်ပြီး အမေရိကန်များ အလုပ်ရရှိရေးနှင့် စီးပွားရေးထူထောင်ရေး လေ့ကျင့်ပေးမည့် Grow with Google အစီအစဉ်ကိုလည်း ထုတ်ပြန်ကြေငြာခဲ့သည်။

အဆိုပါအစီအစဉ်မှာ လူငယ်များအား ကွန်ပျူတာနှင့် စွန့်ဦးစီးပွားရေးလုပ်ငန်း တည်ထောင်ရေးဆိုင်ရာ ကျွမ်းကျင်မှုများ ရရှိလာစေရန် ရည်ရွယ်ခြင်း ဖြစ်သည်။

Google သည် အွန်လိုင်းပညာရေးအသင်းအဖွဲ့များဖြစ်သည့် Udacity နှင့် Coursera စသည်တို့နှင့်လည်းကောင်း၊ ပရဟိတအဖွဲ့အစည်းများဖြစ်သည့် Goodwill နှင့် 4-H တို့နှင့် လည်းကောင်း ချိတ်ဆက်ကာ ကူညီပံ့ပိုးပေးလျက် ရှိနေသည်။

Ref; english.alarabiya.net