အစွန်းရောက်စကားများ ဖယ်ရှားရေး ပိုမိုလုပ်ဆောင်ရန် နည်းပညာကုမ္ပဏီကြီးများ သဘောတူ

အောက်တိုဘာ ၂၂၊ ၂၀၁၇
M-Media

– ကမ္ဘာ့ထိပ်တန်း နည်းပညာကုမ္ပဏီများဖြစ်သည့် Microsoft၊ Facebook၊ Twitter နှင့် Google တို့က အစွန်းရောက်စာသားများပါဝင်သည့် ပို့စ်များကို နာရီပိုင်းအတွင်း ဖယ်ရှားနိုင်ရေး ပိုမိုဆောင်ရွက်သွားမည်ဟု သဘောတူခဲ့ကြသည်။

ယင်းသဘောတူညီချက်ကို အီတလီကျွန်း Ischia ၌ ကျင်းပသည့် G7 နိုင်ငံများနှင့် နည်းပညာကုမ္ပဏီကြီးများ၏ နှစ်ရက်တာ တွေ့ဆုံမှုတွင် ရရှိခဲ့ခြင်းဖြစ်သည်။

တာဝန်ရှိသူများက ဤသို့ပြုလုပ်ရခြင်းမှာ အင်တာနက်ပေါ်မှ ဂျီဟတ်နှင့်ဆိုင်သည့် စာသားများကို ဖယ်ရှားရန် ဖြစ်သည်ဟု ဆိုသည်။ Twitter က ယင်းဆွေးနွေးမှုမှုများမှာ အလွန်အရေးကြီးပြီး အကျိုးရှိသည်ဟု ၎င်းတို့၏ စာမျက်နှာတွင် ရေးသားခဲ့သည်။

သဘောတူညီချက် အသေးစိတ်နှင့် ပတ်သက်၍ မှတ်ချက်ပေးရန် Twitter နှင့် Google နှစ်ခုစလုံးက ငြင်းဆိုခဲ့သည်။ အီတလီပြည်ထဲရေးဝန်ကြီး မာကိုမင်နီတီက ထိုသဘောတူညီချက်မှာ အရေးကြီးသော ကနဦး ဆောင်ရွက်ချက်များ ဖြစ်သည်ဟု ပြောကြားခဲ့သည်။

တွေ့ဆုံမှုအပြီး ထုတ်ပြန်သော စာတစ်စောင်၌ G7 နိုင်ငံများက ဆိုရှယ်မီဒီယာလောကတွင် ရင်ဆိုင်နေရသော စိန်ခေါ်မှုများကို အဓိကထား ဖော်ပြခဲ့ပြီး ၎င်းတို့အနေဖြင့် အစွန်းရောက်အယူအဆများပါဝင်သည့် စာသားများအား နာရီပိုင်းအတွင်း ဖယ်ရှားရန်အတွက် နည်းပညာပိုင်းဆိုင်ရာ ဆောင်ရွက်နိုင်မည့် အဖြေများကို ရှာဖွေရန်လည်း တိုက်တွန်းခဲ့သည်။

ထို့ပြင် ဖယ်ရှားသည့်ပို့စ်များအားလုံးကို အာဏာပိုင်များအား သတင်းပို့ရန်နှင့် ပိုမိုသိရှိနိုင်မည့် နည်းလမ်းများ ဖော်ထုတ်ရန်လည်း ဆော်သြခဲ့သည်။

Ref : BBC