ဘာသာရေးသွေးကွဲမှု တိုင်းပြည်အတွက်မကောင်းနိုင်ဟု မလေးဝန်ကြီးချုပ်ပြော

အောက်တိုဘာ ၂၂၊ ၂၀၁၇
M-Media

– ဘာသာလူမျိုးပေါင်းစုံရှိတဲ့ မလေးရှားမှာ မွတ်စလင်သီးသန့် အ၀တ်လျှော်ဆိုင်ဆိုပြီး လုပ်လာတာကို မလေးရှားဝန်ကြီးချုပ် နာဂျစ်ရာဇတ်က ရှုတ်ချလိုက်ပြီး ဒီလို သွေးကွဲမှုမျိုးဟာ တိုင်းပြည်အတွက်မကောင်းဘူးလို့ ပြောကြားလိုက်ပါတယ်။

မနေ့က ကွာလာလမ်ပူမြို့မှာပြုလုပ်တဲ့ ၂၀၁၇ ခုနှစ် မလေးရှားတရုတ်လူငယ်များညီလာခံမှာ နာဂျစ်က ဒီလိုပြောကြားလိုက်တာ ဖြစ်ပါတယ်။

“ဒီလိုသွေးကွဲမှုကို ကျွန်တော် လက်မခံပါဘူး။ မွတ်စလင်တွေအတွက် သီးသန့် အ၀တ်လျှော်ဆိုင်ဆိုတာမျိုး ဖြစ်လို့မရပါဘူး။ ဒါမှားတယ်လို့ ကျွန်တော်ထင်ပါတယ်”

တိုင်းပြည်အတွင်းမှာ သွေးကွဲမှုတွေမဖြစ်စေမယ့် ရွေးချယ်မှုမျိုးကိုတော့ လုပ်လို့ရတယ်လို့ ၀န်ကြီးချုပ်က ဆိုပါတယ်။

“ကိုယ်ကြိုက်တာကိုယ်ရွေးတာက ရပါတယ်။ ဟာလာလ်မဟုတ်ဘူးလို့ ထင်တာကြောင့် လူတစ်ယောက်က စားသောက်ဆိုင်တစ်ခုကို မသွားဘူးဆိုရင် ဒါဟာ သူ့ဆုံးဖြတ်ချက်ပါ။ မွတ်စလင်တွေမှာ သူတို့ရဲ့ ကိုယ်ပိုင် ယုံကြည်ချက် စည်းကမ်းတွေရှိတယ်။ ဒါပေမယ့် ဒါတွေကို မွတ်စလင်မဟုတ်သူတွေအပေါ် သတ်မှတ်လို့ မရပါဘူး” လို့ နာဂျစ်က ပြောကြားခဲ့ပါတယ်။

အခုလအစောပိုင်း ဂျိုဟိုးပြည်နယ်က အ၀တ်လျှော်ဆိုင်တစ်ခုဟာ မွတ်စလင်သီးသန့်ဆိုတဲ့ ဆိုင်းဘုတ်တပ်ပြီးတဲ့နောက်ပိုင်း မလေးရှားနိုင်ငံတစ်ဝှမ်းမှာ ဝေဖန်မှုတွေ မြင့်တက်လာခဲ့ပါတယ်။

ဘာသာစုံ၊ လူမျိုးစုံ သဟဇာတဖြစ်မှုကို ပျက်ဆီးစေတဲ့ ဒီလုပ်ရပ်အတွက် ဂျိုဟိုးပြည်နယ်ဘုရင်က ပြင်းပြင်းထန်ထန် ဝေဖန်ပြစ်တင်ခဲ့ပြီး ဆိုင်းဘုတ်ဖြတ်ကာ ပြန်လည်တောင်းပန်ဖို့၊ ဒါမှမဟုတ်ရင် ပြည်နယ်ကနေ ထွက်သွားဖို့ တောင်းဆိုခဲ့ပါတယ်။ နောက်ဆုံးမှာတော့ အဲဒီအ၀တ်လျှော်ဆိုင်ပိုင်ရှင်ဟာ မွတ်စလင်သီးသန့်ဆိုတဲ့ ဆိုင်းဘုတ်ကိုဖြုတ်ကာ သူ့ရဲ့ လုပ်ရပ်အတွက် ပြန်လည်တောင်းပန်ခဲ့ပါတယ်။

နာဂျစ်က သူနဲ့ သူ့အစိုးရအတွက် အဓိကဦးစားပေးဟာ လူမျိုးစုံ၊ ဘာသာစုံ ညီညွတ်ရေး၊ သဟဇာတဖြစ်ရေး ဖြစ်တယ်လို့ ဆိုပါတယ်။

“ခင်ဗျားတို့ရဲ့ဝန်ကြီးချုပ်အနေနဲ့ ကျွန်တော်ဟာ အလယ်အလတ်ကျပြီး၊ ရှေ့ရောက်တဲ့ ပေါ်လစီတွေကို ဆက်လက်ချမှတ်သွားမှာ ဖြစ်ပါတယ်” လို့ တရုတ်လူငယ်တွေကို ပြောကြားခဲ့ပါတယ်။

နိုင်ငံရေးမှာ ပါဝင်လေ့မရှိတဲ့ မလေးရှား ပြည်နယ်အသီးအသီးက ဘုရင်တွေဟာ မွတ်စလင်သီးသန့်ဆိုတဲ့ အ၀တ်လျှော်ဆိုင်ကိစ္စအတွက် ကြေငြာချက်တစ်စောင် အခုလအစောပိုင်းမှာ ထုတ်ပြန်ခဲ့ပြီး အဲဒီလုပ်ရပ်ကို ရှုတ်ချကြောင်း၊ နိုင်ငံအတွင်းမှာ ဘာသာရေးသည်းမခံနိုင်မှု မြင့်တက်လာတဲ့အတွက် စိုးရိမ်မိကြောင်း၊ ပြည်သူတွေအနေနဲ့ စည်းစည်းလုံးလုံးနေဖို့ တိုက်တွန်းကြောင်း ဖော်ပြခဲ့ပါတယ်။

Ref: CNA