ရိုဟင်ဂျာဒုက္ခသည်များကို မြန်မာက ပြန်လက်ခံရမည်ဟု အိန္ဒိယပြော

အောက်တိုဘာ ၂၃၊ ၂၀၁၇
M-Media

ဘင်္ဂလားဒေ့ရ်ှရှိ ရိုဟင်ဂျာ ဒုက္ခသည်စခန်း

– ဆယ်စုနှစ်ချီ ကြာမြင့်နေတဲ့ အာရှရဲ့ အကြီးမားဆုံး ဒုက္ခသည်ပြဿနာကို ဖြေရှင်းရေးအတွက် မြန်မာနိုင်ငံက ရိုဟင်ဂျာဒုက္ခသည်တွေကို မဖြစ်မနေ ပြန်လည် လက်ခံရလိမ့်မယ်လို့ အိန္ဒိယနိုင်ငံခြားရေးဝန်ကြီးက ဘင်္ဂလားဒေ့ရ်ှအစိုးရကို ပြောကြားလိုက်ပါတယ်။

ဘင်္ဂလားဒေ့ရ်ှဝန်ကြီးချုပ် ရှိခ်ဟာဆီနာနဲ့ ယမန်နေ့က တွေ့ဆုံစဉ်မှာ ၀န်ကြီး ဆူရ်ှမာ ဆွာရက်ဂ်ျက အခုလိုပြောကြားလိုက်တာဖြစ်ပြီး ဒုက္ခသည်တွေဟာ ဘင်္ဂလားဒေ့ရ်ှအတွက် ၀န်ထုပ်ဝန်ပိုးဖြစ်တယ်လို့ ဆိုပါတယ်။

“မြန်မာနိုင်ငံဟာ သူ့နိုင်ငံသားတွေကို ပြန်ခေါ်ရမှာပါ။ ဒီလူတွေဟာ ဘင်္ဂလားဒေ့ရ်ှအတွက် တော်တော်လေးကြီးမားတဲ့ ၀န်ထုပ်ဝန်ပိုးဖြစ်ပါတယ်။ ဘင်္ဂလားဒေ့ရ်ှက ဒီဝန်ထုပ်ဝန်ပိုးကို ဘယ်လောက်ကြာကြာ ထမ်းထားရမှာလဲ။ ဒီပြဿနာနဲ့ပတ်သက်ပြီး အမြဲတမ်းအတွက် အဖြေတစ်ခု ရှိသင့်ပါတယ်”

ရှိခ်ဟာဆီနာဟာ မြန်မာနိုင်ငံဖက်က ထွက်ပြေးလာတဲ့ ရိုဟင်ဂျာတွေကို နယ်စပ်ဖြတ်ကျော်ခွင့်ပေးထားပြီး ကော့ဇ်ဘဇားက ဒုက္ခသည်စခန်းတွေမှာ ခိုလှုံခွင့် ပြုထားပါတယ်။

သြဂုတ်လနှောင်းပိုင်းကပြီး ဖြစ်ပွားခဲ့တဲ့ ရခိုင်ပြည်နယ်က မငြိမ်မသက်မှုတွေကြောင့် ရိုဟင်ဂျာ ၆ သိန်းနီးပါးလောက်ဟာ ဘင်္ဂလားဒေ့ရ်ှဖက်ကို ထွက်ပြေးခဲ့ရတယ်လို့ ကုလက ဆိုပါတယ်။

ဘင်္ဂလားဒေ့ရ်ှကို ရောက်ရှိနေတဲ့ ဆွာရက်ဂ်ျဟာ စောစောပိုင်းက ဘင်္ဂလားဒေ့ရ်ှနိုင်ငံခြားရေးဝန်ကြီး မဟ်မူဒ်အလီနဲ့ တွေ့ဆုံခဲ့ပြီး ရခိုင်ပြည်နယ်က အကြမ်းဖက်မှုအတွက် အိန္ဒိယက စိုးရိမ်မိတယ်လို့ ပြောကြားခဲ့ပါတယ်။

“ပြည်သူတွေရဲ့ အကျိုးကို ရှေ့ရှုပြီး အခြေအနေကို ထိန်းထိန်းသိမ်းသိမ်း ကိုင်တွယ်ဖို့အတွက် ကျွန်မတို့ တိုက်တွန်းပါတယ်” လို့ အိန္ဒိယနိုင်ငံခြားရေးဝန်ကြီးက ဆိုပါတယ်။

ရိုဟင်ဂျာတွေကို မြန်မာနိုင်ငံက အသိအမှတ်ပြုဖို့ အကြံပြုချက်တွေ အကောင်အထည်ဖော်ရေးကို အိန္ဒိယက ထောက်ခံကြောင်း၊ ရခိုင်ပြည်နယ်မှာ စီးပွားရေးအခွင့်အလမ်းတွေ ဖော်ဆောင်ပေးတာဟာ ပြဿနာ ပြေလည်စေရေး အထောက်အကူပြုနိုင်မှာဖြစ်ကြောင်း ဆွာရက်ဂ်ျက ထည့်သွင်း ပြောကြားခဲ့ပါတယ်။

ဘင်္ဂလားဒေ့ရ်ှနိုင်ငံခြားရေးဝန်ကြီးက ရုိုဟင်ဂျာပြဿနာအတွက် ငြိမ်းချမ်းတဲ့အဖြေတစ်ခု ရှာဖွေရေး မြန်မာအစိုးရကို ဆက်လက်ဖိအားပေးတဲ့နေရာမှာ အိန္ဒိယကလည်း ပါဝင်ဖို့ တိုက်တွန်းခဲ့ပါတယ်။

Ref: Washingtonpost