နိုင်ငံ၏ ကာကွယ်ရေးစွမ်းအားနှင့် အပေးအယူမလုပ်ဟု အီရန်အဓိပတိပြော

အောက်တိုဘာ ၂၆၊ ၂၀၁၇
M-Media

ဗိုလ်လောင်းသင်တန်းဆင်းအခမ်းအနားတွင် တွေ့ရသည့် ခါမေနီ

– အီရန်နိုင်ငံ၏ ကာကွယ်ရေးအင်အားမှာ ညှိနှိုင်းဆွေးနွေးရန်မဟုတ်ဘဲ ရန်သူများက အီရန်ကို အင်အားနည်းအောင် ကြိုးပမ်းနေသော်လည်း နိုင်ငံ၏ ကာကွယ်ရေးစွမ်းအားကို တောင့်တင်းခိုင်မာအောင် ပြုလုပ်သွားမည်ဟု အီရန်အဓိပတိ အယာတိုလာ ဆယဒ် အလီခါမေနီက ပြောကြားလိုက်သည်။

ယမန်နေ့ အီရန်ဗိုလ်လောင်များ သင်တန်းဆင်းအခမ်းအနားတွင် ယခုကဲ့သို့ ပြောကြားခဲ့ခြင်းဖြစ်ပြီး အီရန်၏ ဒေသတွင်း လွှမ်းမိုးမှုအပေါ် အင်အားကြီးနိုင်ငံများက မနှစ်မြို့ကြောင်း ထောက်ပြခဲ့ကာ၊ ရန်သူနိုင်ငံများက အီရန်၏ အင်အားကို အနှောင့်အယှက်တစ်ခုအဖြစ် မြင်ကြောင်း ထည့်သွင်းပြောဆိုခဲ့သည်။

“တိုင်းပြည်ရဲ့ ကာကွယ်ရေးကိစ္စတွေနဲ့ စွမ်းအားတွေဟာ ဆွေးနွေးညှိနှိုင်းဖို့နဲ့ အပေးအယူလုပ်ဖို့ မဟုတ်ဘူးဆိုတာကို ကျွန်တော့်အနေနဲ့ ထပ်ပြီး ကြေငြာလိုပါတယ်။ ကာကွယ်ရေးပစ္စည်းတွေ၊ တိုင်းပြည်ရဲ့စွမ်းအားကို အထောက်အကူပေးထားတဲ့ ကိစ္စတွေနဲ့ ပတ်သက်လာရင် ကျွန်တော်တို့ဟာ ရန်သူတွေနဲ့ ဘယ်လိုအပေးအယူမျိုးမှ လုပ်မှာမဟုတ်သလို အရင်ကထက်ပိုပြီး တောင့်တင်းတဲ့ စွမ်းအားမျိုး ရရှိနိုင်တဲ့ လမ်းကြောင်းကို ဆက်သွားမှာဖြစ်ပါတယ်”

ထို့ပြင် ရန်သူများမှာ ဒေသတွင်းနှင့် ဒေသပြင်ပရှိ နိုင်ငံများအကြား အီရန်၏ သြဇာကို ဆန့်ကျင်နေကြကြောင်း၊ ထိုအရာများကို တွန်းလှန်ရန်အတွက် တိုင်းပြည်၏ အင်အားအပေါ် အားကိုးရန်လိုကြောင်း ခါမေနီက ထည့်သွင်းပြောကြားခဲ့သည်။

၂၀၁၅ ခုနှစ်က အင်အားကြီး ၆ နိုင်ငံနှင့် ချုပ်ဆိုခဲ့သည့် အီရန်၏ နျူသဘောတူစာချုပ်ကို ဖျက်သိမ်းနိုင်ရန် ဒေါ်နယ်ထရမ့်က ကြိုးစားလာမှုကြောင့် အီရန်နှင့် အမေရိကန်အကြား တင်းမာမှုများ ထပ်မံမြင့်တက်လာခဲ့သည်။ ဥရောပသမဂ္ဂအပါအ၀င် သဘောတူညီချက်တွင် လက်မှတ်ရေးထိုးထားသည့် အခြားအင်အားကြီးနိုင်ငံများက မိမိတို့အနေဖြင့် စာချုပ်ကတိက၀တ်အတိုင်း ဆက်ရှိသွားမည်ဟု ပြောကြားထားသည်။

Ref : Press TV