၂ ရက်အတွင်း ရခိုင်ပြည်နယ်မှ ထွက်ပြေးရသည့် ရိုဟင်ဂျာဒုက္ခသည် ၇ ဦး ရေနစ်သေဆုံး

အောက်တိုဘာ ၃၁၊ ၂၀၁၇
M-Media

ဘင်္ဂလားဒေ့ရ်ှဖက်သို့ ထွက်ပြေးရသည့် ရိုဟင်ဂျာများ

– ရခိုင်ပြည်နယ်ကနေ ဘင်္ဂလားဒေ့ရ်ှဖက်ကို ရိုဟင်ဂျာဒုက္ခသည်တွေ စက်လှေနဲ့ ထွက်ပြေးမှုမှာ နှစ်ရက်အတွင်း အနည်းဆုံး ၇ ဦး ရေနစ်သေဆုံးခဲ့တယ်လို့ ဘင်္ဂလားဒေ့ရ်ှအာဏာပိုင်တွေက ပြောကြားလိုက်ပါတယ်။

ဒီနေ့မနက်ပိုင်းမှာ ရိုဟင်ဂျာ ၃၀ ကျော်လောက်ကို တင်ဆောင်သွားတဲ့ စက်လှေဟာ ရာသီဥတုမကောင်းတဲ့အတွက် ဘင်္ဂလားဒေ့ရ်ှကမ်းရိုးတမ်းမှာ နစ်မြုပ်ခဲ့ပြီး အနည်းဆုံး ၄ ဦး သေဆုံးခဲ့ပါတယ်။

အဲဒီလှေမှောက်မှုကြောင့် ဒဏ်ရာရပြီး ဆေးရုံတင်ထားရသူတစ်ချို့ ရှိနေကာ ကျန်တဲ့သူတွေကတော့ ကမ်းခြေကို ကူးခတ်အရောက်သွားနိုင်ခဲ့ပါတယ်။ ဘင်္ဂလားဒေ့ရှ် နယ်ခြားစောင့်တပ်ဖွဲ့ကလည်း တစ်ချို့ကို ကယ်ဆယ်ခဲ့ပါတယ်။

အဲဒီမတိုင်ခင်တုန်းကလည်း ရေနစ်သေဆုံးခဲ့တဲ့ ရင်ခွင်ပိုက်ကလေးငယ် ၃ ဦးရဲ့ အလောင်းကို ဘင်္ဂလားဒေ့ရ်ှဖက်က ဆယ်ယူရရှိခဲ့ပြီး မနေ့ညနေက တက်ခ်နက်မြို့ကို ကမ်းကပ်မယ့် စက်လှေပေါ်ကနေ ရေထဲကို ပြုတ်ကျသေဆုံးခဲ့တာဖြစ်တယ်လို့ ဘင်္ဂလားဒေ့ရ်ှရဲတပ်ဖွဲ့က ပြောပါတယ်။ သေဆုံးသွားတဲ့ ကလေးငယ် ၃
ဦးဟာ ၃ လကနေ ၁၀ လသားလေးတွေဖြစ်တယ်လို့ ဆိုပါတယ်။

သြဂုတ်လနှောင်းပိုင်းကတည်းက စတင်ခဲ့တဲ့ ရခိုင်ပြည်နယ်မြောက်ပိုင်း မတည်ငြိမ်မှုကြောင့် ဘင်္ဂလားဒေ့ရ်ှဖက်ကို ရုိုဟင်ဂျာဒုက္ခသည် ၆ သိန်းလောက် ထွက်ပြေးခဲ့ရပြီး နတ်မြစ်အတွင်း လှေမှောက်ကာ ရေနစ်သေဆုံးသူ အရေအတွက်က အနည်းဆုံး ၂၀၀ လောက် ရှိနေပါတယ်။

Ref: CNA