ဒုံးခွင်းစနစ်ကြောင့် တရုတ်နှင့် တောင်ကိုရီးယားတို့၏တင်းမာမှု ပြေလည်

နိုဝင်ဘာ ၁၊ ၂၀၁၇
M-Media

– အမေရိကန်၏ ဒုံးခွင်းစနစ် THAAD ကြောင့် တစ်နှစ်တာကြာမြင့်ခဲ့သည့် တောင်ကိုရီးယားနှင့် တရုတ်တို့၏ မကျေလည်မှုများကို အဆုံးသတ်ရန် အင်္ဂါနေ့တွင် နှစ်နိုင်ငံစလုံးက သဘောတူညီခဲ့ကြသည်ဟု သိရသည်။

မြောက်ကိုရီးယားရန်ကြောင့် တောင်ကိုရီးယားတွင် THAAD ဒုံးခွင်းစနစ် ချထားမှုကို တရုတ်က ဒေါသထွက်ခဲ့ပြီး၊ ခရီးသွားလုပ်ငန်း၊ အလှကုန်၊ ဖျော်ဖြေရေးတို့ အပါအ၀င် တရုတ်နိုင်ငံကို မှီခိုနေရသည့် တောင်ကိုရီးယား၏ စီးပွားရေးလုပ်ငန်းများအားလုံး တရုတ်က သပိတ်မှောက်ခဲ့သည်။

“ကိုရီးယားနဲ့ တရုတ်နိုင်ငံအကြား ဆက်သွယ်မှု၊ ပူးပေါင်းဆောင်ရွက်မှု အားကောင်းခြင်းဟာ အပြန်အလှန် အကျိုးစီးပွား ဖြစ်ထွန်းစေတယ်ဆိုတဲ့ အမြင်မျိုး နှစ်ဖက်စလုံးမှာရှိပြီး၊ ဒီလို ဆက်သွယ်ရေး၊ ပူးပေါင်းဆောင်ရွက်ရေးကို နဂိုဖြစ်ထွန်းထားတဲ့ လမ်းကြောင်းအတိုင်း အလျင်အမြန် ပြန်လည်ဆောင်ရွက်သွားဖို့ သဘောတူခဲ့ကြပါတယ်” ဟု တောင်ကိုရီးယား နိုင်ငံခြားရေးဝန်ကြီးဌာနမှ ထုတ်ပြန်ခဲ့သည့် ကြေငြာချက်တွင် ဖော်ပြထားသည်။

အမေရိကန်သမ္မတ ဒေါ်နယ်ထရမ့် တရုတ်နိုင်ငံသို့ လာရောက်ရန် ရက်ပိုင်းသာလိုတော့သည့်အချိန်တွင် တောင်ကိုရီးယားနှင့် တရုတ်နိုင်ငံအကြား ယခုကဲ့သို့ ပြေလည်မှု ရရှိခဲ့ခြင်းလည်းဖြစ်သည်။

တရုတ်နှင့် မြောက်ကိုရီးယားက တစ်ဖက်၊ တောင်ကိုရီးယားနှင့် အမေရိကန်က တစ်ဖက် နီးကပ်သော ဆက်ဆံရေးများ ရှိသော်လည်း ဒုံးခွင်းစနစ် ချထားမှု မတိုင်ခင်က တရုတ်နှင့် တောင်ကိုရီးယားတို့မှာ ဆက်ဆံရေး ချောမွေ့ခဲ့ကြပြီး၊ တရုတ်သည် တောင်ကိုရီးယား၏ အကြီးမားဆုံးသော ကုန်သွယ်ဖက်လည်း ဖြစ်သည်။

THHAD ဒုံးခွင်းစနစ်၏ အားကောင်းသော ရေဒါစနစ်က တရုတ်နိုင်ငံ၏ အချုပ်အခြာကို ထိပါးသည်ဟု တရုတ်ဖက်က မှတ်ယူထားသည်။

Ref : CNA