ရုရှားကျောင်းသားတစ်ဦး ဆရာကိုသတ်ပြီး ဓာတ်ပုံကို အွန်လိုင်းတွင် လွှင့်တင်

နိုဝင်ဘာ ၂၊ ၂၀၁၇
M-Media

ဆရာကို သတ်ဖြတ်ခဲ့သည့် အန်ဒရေး အီမီလီယန်နီကော့ဗ်

– ရှရှားနိုင်ငံ မော်စကိုမြို့က အသက်မွေးဝမ်းကြောင်း ကောလိပ်တစ်ခုမှာ အသက် ၁၈ နှစ်အရွယ် ကျောင်းသားတစ်ဦးက ဆရာဖြစ်သူကို ဓားနဲ့ထိုးသတ်ပြီး ဆိုရှယ်မီဒီယာမှာ လွှင့်တင်ခဲ့တာကြောင့် ရုရှားနိုင်ငံတစ်ဝှမ်း တုန်လှုပ်ခြောက်ခြားသွားခဲ့ပါတယ်။

အန်ဒရေး အီမီလီယန်နီကော့ဗ်ဆိုတဲ့ အဲဒီကျောင်းသားဟာ ကျန်းမာရေးနဲ့ ဘေးအန္တရာယ်ကင်းရှင်းရေးအတန်းက အသက် ၄၄ နှစ်အရွယ် ဆရာ ဆာဂျီ ဒါနီလော့ဗ်ကို အားလပ်ချိန်မှာ သတ်ဖြတ်ခဲ့တာဖြစ်ပြီး နောက်ပိုင်း အဲဒီကျောင်းသားကိုယ်တိုင်းလည်း မိမိကိုယ်ကို လည်ပင်းလှီးဖြတ် သတ်သေခဲ့ပါတယ်။

ရဲတပ်ဖွဲ့ကတော့ ၂ ပတ်လောက် ကျောင်းပြေးတဲ့ အီမီလီယန်နီကော့ဗ်ကို ဆရာက ဆူပူကြိမ်းမောင်းမှုအတွင်း စကားများကာ ဒီလိုဖြစ်ခဲ့တာလို့ ပြောကြားခဲ့ပါတယ်။

ဆရာဖြစ်သူကို သတ်ဖြတ်ပြီးတဲ့နောက် လဲကျနေတဲ့အလောင်းကို နောက်ခံထားပြီး ကျေကျေနပ်နပ်ပြုံးနေတဲ့ သူ့ပုံကို အီမီလီယန်နီကော့ဗ်က ရုရှားဆိုရှယ်မီဒီယာ VK ရဲ့ စာမျက်နှာမှာ လွှင့်တင်ခဲ့ပါတယ်။

ကျောင်းသားတွေက ဆရာ ဒါနီလော့ဗ်ဟာ ဖော်ရွေသဘောကောင်းသူဖြစ်ပြီး၊ စည်းကမ်းလည်း တင်းကျပ်ကြောင်း၊ စစ်တပ်လာသူဖြစ်တဲ့အတွက် ကျောင်းသားတွေကို ကြပ်ကြပ်မတ်မတ် ကိုယ်တွယ်ကြောင်း၊ ဒါပေမယ့် ပုဂ္ဂိုလ်ရေးအရ စွက်ဖက်မှုတွေ၊ ပြောဆိုမှုတွေ မရှိကြောင်း ပြောကြားခဲ့ပါတယ်။

ဒါနီလော့ဗ်ဟာ စိတ်ပိုင်းဆိုင်ရာ ပြဿနာမရှိဘူးလို့လည်း အတန်းဖော်တွေက ပြောပါတယ်။

ရဲတပ်ဖွဲ့ကတော့ ဒါဟာ ကြိုတင်ကြံရွယ်သတ်ဖြတ်မှုလား၊ ဒေါသအလျောက်ဖြစ်ပွားတာလားဆိုတာကို စစ်ဆေးနေတယ်လို့ ပြောကြားခဲ့ပါတယ်။

Ref: RT