ရိုဟင်ဂျာကိစ္စဆွေးနွေးမှု အားတက်စရာကောင်းသည်ဟု ဥရောပအကြီးအကဲပြော

နိုဝင်ဘာ ၂၀၊ ၂၀၁၇
M-Media

နိုင်ငံတော်အတိုင်ပင်ခံပုဂ္ဂိုလ်နှင့် အီးယူ နိုင်ငံခြားရေးဝန်ကြီး

– ရခိုင်ပြည်နယ်က ရိုဟင်ဂျာကိစ္စကို ဒေါ်အောင်ဆန်းစုကြည်နဲ့ ဆွေးနွေးမှုဟာ ‘အင်မတန် အားတက်ဖွယ်ကောင်းတယ်’ လို့ ဥရောသမဂ္ဂရဲ့ နိုင်ငံခြားရေးဝန်ကြီး ဖက်ဒရီကာ မိုဂ်ဟီရီနီက ပြောကြားလိုက်ပါတယ်။

တနင်္ဂနွေနေ့က ဘင်္ဂလားဒေ့ရ်ှဖက်မှာရှိတဲ့ ရိုဟင်ဂျာဒုက္ခသည်တွေကို သွားရောက်ကြည့်ရှုခဲ့ပြီးတဲ့နောက် နိုင်ငံခြားရေးဝန်ကြီးဟာ မြန်မာနိုင်ငံကို ရောက်ရှိလာခဲ့တာဖြစ်ပြီး ဒီကနေ့မှာ နိုင်ငံတော်အတိုင်ပင်ခံ ဒေါ်အောင်ဆန်းစုကြည်နဲ့ တွေ့ဆုံဆွေးနွေးခဲ့တာဖြစ်ပါတယ်။

“ဆွေးနွေးမှုဟာ တော်တော်လေး အားတက်စရာကောင်းပါတယ်။ အမှန်တကယ် ထိထိရောက်ရောက် ဖြစ်လာမယ်လို့ ကျွန်မယုံကြည်တဲ့ မြန်မာနဲ့ ဘင်္ဂလားဒေ့ရ်ှက ဖြစ်နိုင်ချေတွေအတွက် ကျွန်မ အလွန်ကို အားတက်မိပါတယ်” လို့ မိုဂ်ဟီရီနီက နေပြည်တော်က တွေ့ဆုံမှုအပြီးမှာ သတင်းထောက်တွေကို ပြောကြားခဲ့ပါတယ်။

မြန်မာနိုင်ငံက ထွက်ပြေးသွားရတဲ့ ရိုဟင်ဂျာဒုက္ခသည်တွေကို ပြန်လည်လက်ခံရေး ဆောင်ရွက်မှုတွေကိုလည်း ကြိုဆိုတယ်လို့ သူမက ဆိုပါတယ်။

ဘင်္ဂလားဒေ့ရ်ှက ရိုဟင်ဂျာဒုက္ခသည်တွေ ရခိုင်ပြည်နယ်ကို ပြန်လာနိုင်ရေး ဘင်္ဂလားဒေ့ရ်ှနဲ့ မြန်မာတို့အကြား ခိုင်မာတဲ့ သဘောတူညီချက်မျိုး မရသေးဘဲ၊ လူ့အခွင့်အရေးအဖွဲ့တွေက ရိုဟင်ဂျာတွေဟာ အကြမ်းဖက်မှုတွေ၊ ကြောက်ရွံ့မှုတွေ၊ ငတ်မွတ်ခါင်းပါးမှုတွေကြောင့် ဆက်လက်ထွက်ပြေးနေရတဲ့အတွက် ဒုက္ခသည်တွေ နေရပ်ပြန်လာရေးဟာ မြန်မြန်ဆန်ဆန် ဖြစ်လာမှာမဟုတ်သေးဘူးလို့ ထောက်ပြကြပါတယ်။

ဥရောပသမဂ္ဂ နိုင်ငံခြားရေးဝန်ကြီးဟာ နေပြည်တော်မှာပြုလုပ်မယ့် အာရှနှင့် ဥရောပ နိုင်ငံခြားရေးဝန်ကြီးများ အစည်းအဝေးကို တက်ရောက်မှာ ဖြစ်ပါတယ်။

Ref: AFP