လုံခြုံရေးအကြောင်းပြချက်ဖြင့် ကလေးဝတ် စမတ်နာရီများကို ဂျာမနီပိတ်ပင်

နိုဝင်ဘာ ၂၀၊ ၂၀၁၇
M-Media

– ကလေးငယ်တွေအတွက် ရည်ရွယ်ပြီး ထုတ်လုပ်ထားတဲ့ စမတ်နာရီတွေဟာ တစ်ကိုယ်ရေလုံခြုံရေးကို ထိခိုက်စေတယ်ဆိုပြီး ဂျာမနီဆက်သွယ်ရေးအာဏာပိုင်အဖွဲ့ Federal Network Agency က ပိတ်ပင်လိုက်ပါတယ်။

ဆင်းမ်ကဒ်ထည့်လို့ရပြီး ဖုန်းခေါ်ဆိုမှု လုပ်ဆောင်ချက်တစ်ချို့ ပါဝင်တဲ့ အဲဒီစမတ်နာရီကို ကလေးငယ်တွေ ဘယ်ရောက်နေလဲဆိုတာ မိဘတွေ သိရှိနိုင်ဖို့ ရည်ရွယ်ထုတ်လုပ်တာဖြစ်ပြီး GPS နည်းပညာနဲ့ ဖုန်းထဲက အက်ပလီကေးရှင်းကိုအသုံးပြုပြီး ကြည့်နိုင်မှာဖြစ်ပါတယ်။

Federal Network Agency ဟာ အရင်ကလည်း အင်တာနက်ချိတ်ဆက်အသုံးပြုရတဲ့ အရုပ်မ My Friend Cayla ကို လုံခြုံရေးအကြောင်းပြချက်နဲ့ ပိတ်ပင်ခဲ့ဖူးပါတယ်။

ကျွမ်းကျင်သူတွေက လုံခြုံရေးဆိုင်ရာ တော်တော်လေးအားနည်းတဲ့ ဒီ စမတ်နာရီတွေဟာ တစ်ကိုယ်ရေ လုံခြုံရေးကို ကျိုးပေါက်စေနိုင်ပြီး အန္တရာယ်ရှိကြောင်း၊ Federal Network Agency ရဲ့ ဒီလိုပိတ်ပင်မှုဟာ ဒီနယ်ပယ်မှာ အပြောင်းလဲဖြစ်လာမှာဖြစ်ကြောင်း ပြောကြားခဲ့ပါတယ်။

အေဂျင်စီက ထုတ်ပြန်တဲ့ ကြေငြာချက်မှာ ဒီလို စမတ်နာရီ ထုတ်လုပ်ဖြန့်ဖြူးတဲ့ ကုမ္ပဏီတော်တော်များများကို အရေးယူထားတယ်လို့ ဖော်ပြထားပါတယ်။

“အက်ပလီကေးရှင်းကနေတစ်ဆင့် မိဘတွေဟာ ဒီလို ကလေးပတ်နာရီတွေကို အသုံးပြုပြီး ကလေးပတ်ဝန်းကျင်က လှုပ်ရှားမှုကို မသိမသာ နားထောင်တာမျိုး လုပ်လာနိုင်ကာ ဒါဟာ တရားမ၀င်တဲ့ ဆက်သွယ်မှုစနစ်တစ်ခုပါ။ သုတသနတွေအရ ဒီနာရီတွေကို ကျောင်းခန်းထဲမှာ ဆရာတွေရဲ့ စာသင်မှုကို နားထောင်ဖို့ အသုံး
ပြုတယ်ဆိုပြီး တွေ့ခဲ့ရပါတယ်” လို့ ကြေငြာချက်က ဆိုပါတယ်။

ကျောင်းသားတွေမှာ ဒီလို စမတ်နာရီမျိုး ၀တ်ဆင်ထားလားဆိုတာကို ဂရုစိုက်ဖို့လည်း အေဂျင်စီက စာသင်ကျောင်းတွေကို တိုက်တွန်းထားပါတယ်။

Ref: BBC