စစ်လျှော့ချရေးဇုန်တွင် ဆီးရီးယားအစိုးရက လေကြောင်းတိုက်ခိုက်မှုကြောင့် အရပ်သားများသေဆုံး

နိုဝင်ဘာ ၂၇၊ ၂၀၁၇
M-Media

– ပြီးခဲ့သည့် ရက်ပိုင်းအတွင်း ဆီးရီးယားအစိုးရ၏ လေကြောင်းတိုက်ခိုက်မှုနှင့် ဗုံးကြဲမှုများကြောင့် အရပ်သားများစွာ သေဆုံးခဲ့သည်ဟု တက်ကြွလှုပ်ရှားသူများက ယမန်နေ့တွင် ပြောကြားလိုက်သည်။

ဒမတ်စတ်အပြင်ဘက် အရှေ့ဂူတာခရိုင်တွင် သူပုန်များ ထိန်းချုပ်ထားသော ဒေသအား ဆီးရီးယားအစိုးရက တိုက်ခိုက်မှုများ တိုးမြှင့်ပြုလုပ်မှုအတွင်း မနေ့က အနည်းဆုံး ၂၃ ဦး သေဆုံးခဲ့ခြင်း ဖြစ်သည်။

ယူကေအခြစိုက် ဆီးရီးယား လူ့အခွင့်အရေးစောင့်ကြည့်အဖွဲ့ ဒါရိုက်တာဖြစ်သူ ရာမီ အဘ်ဒဲလ် ရဟ်မန်က ဆိုးဆိုးရွားရွား ဒဏ်ရာရသူ အရေအတွက် များပြားခြင်းကြောင့် သေဆုံးသူ မြင့်တက်လာနိုင်သည်ဟု ပြောကြားခဲ့သည်။

ဂူတာခရိုင်တွင် ပြီးခဲ့သည့် ၂ ပတ်အတွင်း အစိုးရ၏ တိုက်ခိုက်မှုများကြောင့် အရပ်သား ၁၀၀ ကျော် သေဆုံးခဲ့သည်ဟုလည်း စောင့်ကြည့်အဖွဲ့က ဆိုသည်။

ယမန်နေ့တိုက်ခိုက်မှုမှာ လူနေရပ်ကွက်များကို ပစ်မှတ်ထားခဲ့ခြင်းဖြစ်သည်။ အရှေ့ဂူတာခရိုင်မှာ တူရကီ၊ ရုရှားနှင့် အီရန်တို့က သဘောတူညီထားသည့် တိုက်ပွဲများ လျှော့ချရေးဇုန်လည်း ဖြစ်သည်။

Ref: Aljzeera