ငယ်ငယ်ရွယ်ရွယ်ဖြင့်ထိပ်ပြောင်ခြင်းက နှလုံးရောဂါလက္ခဏာဟု လေ့လာမှုတစ်ခုတွင် တွေ့ရှိ

ဒီဇင်ဘာ ၂၊ ၂၀၁၇

M-Media

– အသက် ၄၀ အောက် အမျိုးသားတွေမှာ ထိပ်ပြောင်လာပြီး၊ ဆံပင်တွေ ဖြူလာတာဟာ အ၀လွန်တာထက်ပိုပြီး နှလုံးရောဂါဖြစ်ပွားမှု အန္တရာယ် မြင့်တက်လာတယ်ဆိုတာ ပြသတာဖြစ်ကြောင်း လေ့လာမှုတစ်ခုမှာ တွေ့ရှိခဲ့ပါတယ်။

အိန္ဒိယနိုင်ငံမှာ ပြုလုပ်ခဲ့တဲ့ အဲဒီသုတေသနမှာ လူငယ်အမျိုးသားပေါင်း ၂၀၀၀ ကျော်လောက်ကို လေ့လာခဲ့တာဖြစ်ပြီး နှလုံးသွေးကြောရောဂါတွေကို ခံစားနေရတဲ့ အမျိုးသားတွေဟာ စောစောစီးစီး ထိပ်ပြောင်တဲ့၊ ဆံပင်ဖြူတဲ့သူတွေ ဖြစ်နေပါတယ်။

ဗြိတိသျှ နှလုံးရောဂါဆိုင်ရာ ဖောင်ဒေးရှင်းက ဆေးဘက်ဆိုင်ရာဒါရိုက်တာ ဒေါက်တာ မိုက် ကနပ်တန်က ဒီတွေ့ရှိမှုကြောင့် အသက်ငယ်သေးတဲ့ အမျိုးသားတွေမှာ ထိပ်ပြောင်တာ၊ ဆံပင်ဖြူတာတွေကို တွေ့ရပြီဆိုရင် သူတို့တွေမှာ နှလုံးရောဂါ ဖြစ်ပွားနိုင်ချေ မြင့်တက်လာတယ်ဆိုတာကို ဖော်ထုတ်နိုင်မှာ ဖြစ်ကြောင်း၊ ကိုလက်စထရောများပြားတာ၊ သွေးတိုးရောဂါတွေကလည်း နှလုံးရောဂါဖြစ်စေတဲ့ အဓိက အကြောင်းရာတွေ ဖြစ်ကြောင်း ပြောကြားခဲ့ပါတယ်။

လေ့လာမှုကို ဦးဆောင်ခဲ့တဲ့ ဒေါက်တာ ကာမာလ် ရှာရ်မာက ခန္ဓာကိုယ်အတွင်း ဇီဝဖြစ်စဉ်တွေ ပြောင်းလဲသွားခြင်းကို ဆံပင်အရောင်မှာ သွားပြီး ထင်ဟပ်စေတယ်လို့ ဆိုပါတယ်။

၂၀၁၃ ခုနှစ်အတွင်း ဂျပန်နိုင်ငံမှာ ပြုလုပ်ခဲ့တဲ့ လေ့လာမှုတစ်ခုမှာလည်း နှလုံးရောဂါဖြစ်ပွားမှုနဲ့ ထိပ်ပြောင်ခြင်း စက်ဆက်မှုကို တွေ့ရှိခဲ့ရပါတယ်။

Ref: BBC