ကမ္ဘာတစ်ဝှမ်း ပဋိပက္ခဒဏ်ခံပြည်သူများအား ကူညီရန် လိုအပ်ငွေ စံချိန်တင်

ဒီဇင်ဘာ ၂၊ ၂၀၁၇
M-Media

ဆီးရီးယားမှ ကလေးငယ်များ

– ကမ္ဘာတစ်ဝှမ်းရှိ ပဋိပက္ခများကြောင့် အတိဒုက္ခခံစားနေရသူများအတွက် လူသားချင်း စာနာထောက်ထားမှုဆိုင်ရာ အကူအညီများပေးရန် ၂၀၁၈ခုနှစ်တွင် ကန်ဒေါ်လာ ၂၂.၅ ဘီလီယံ လိုအပ်မည်ဟု ကုလက ပြောကြားလိုက်ပြီး စံချိန်တင် ပမာဏလည်းဖြစ်သည်။

တောင်ဆူဒန်၊ ဆီးရီးယား၊ အာဖဂန်တွင် ဖြစ်ပွားနေသည့် ပဋိပက္ခများ၊ မြန်မာနိုင်ငံမှ ထွက်ပြေးရသည့် ဒုက္ခသည်များ အပါအ၀င် ကမ္ဘာတစ်ဝှမ်း လူပေါင်း ၁၃၅ သန်းမှာ အကူအညီများ လိုအပ်နေပြီး ယီမင်နိုင်ငံမှာ လူသားချင်း စာနာထောက်ထားမှုဆိုင်ရာ အဆိုးဝါးဆုံးအခြေအနေဖြင့် ရင်ဆိုင်နေရသည်။

စစ်ပွဲများ ဖြစ်ပွားနေသည့် ယီမင်တွင် အစားအသောက် ပြတ်လတ်မှုနှင့် ၀မ်းရောဂါ ဖြစ်ပွားနေပြီး အကူအညီလိုအပ်နေသူမှာ ၂၂ သန်း ကျော် ရှိနေသည်။

နိုက်ဂျီးရီးယားတွင် စစ်တပ်နှင့် လက်နက်ကိုင်အုပ်စုများအကြား တိုက်ခိုက်မှုများကြောင့် အမျိုးသမီးအများစုအပါအ၀င် လူပေါင်း ၁၄.၅ သန်းမှာ အတိဒုက္ခနှင့် ရင်ဆိုင်နေရသည်။ အာဖရိကရှိ ပဋိပက္ခဖြစ်ပွားရာ အခြားနိုင်ငံတစ်ခုမှာ ကွန်ဂိုနိုင်ငံဖြစ်ပြီး လူပေါင်း ၁၃ သန်းကျော်မှာ လူသားချင်း စာနာထောက်ထားမှုဆိုင်ရာ ဆိုးရွား
သည့် အခြေအနေဖြင့် ရင်ဆိုင်နေရသည်။

ကုလက တောင်းဆိုသည့် ငွေပမာဏ၏ ၃ ပုံတစ်ပုံမှာ ၇ နှစ်ကြာ ပြည်တွင်းစစ်ဖြစ်ပွားနေသည့် ဆီးရီးယားနိုင်ငံမှ ဆီးရီးယားပြည်သူ ၂၂ သန်းကျော်မှာ အကူအညီများ ပေးအပ်ရန် ဖြစ်သည်။

အတိဒုက္ခရောက်နေသည့် လူပေါင်း ၁၃၅ သန်းမှ ၉၁ သန်းကိုသာ ကုလက ကူညီမည်ဖြစ်ပြီး လိုအပ်သည့် ၂၂.၅ ဘီလီယံကို အပြည့်အ၀ ရရှိရန်မှာ မလွယ်ကူပေ။

ပြီးခဲ့သည့်နှစ်က ဒုက္ခသည်များကို ကူညီရန်အတွက် ကုလက တောင်းဆိုခဲ့သည့် ရန်ပုံငွေ၏ စုစုပေါင်း ၅၂.၅ ရာခိုင်နှုန်းသာ ရရှိခဲ့သည်။

Ref: Aljazeera