မြန်မာစစ်တပ်-AA တိုက်ပွဲကြောင့် ဒုက္ခသည် တစ်ထောင်ကျော် အိန္ဒိယသို့ ထွက်ပြေး

ဒီဇင်ဘာ ၄၊ ၂၀၁၇
M-Media

အိန္ဒိယသို့ ထွက်ပြေးရသည့် မြန်မာနိုင်ငံမှ လူများ

– မြန်မာစစ်တစ်နဲ့ ရခိုင်လက်နက်ကိုင်အဖွဲ့ (AA) တို့အကြား တိုက်ပွဲတွေအတွင်း အိုးအိမ်စွန့်ခွာ ထွက်ပြေးခဲ့ရတဲ့ မြန်မာနိုင်ငံက လူ ၁၃၀၀ လောက်ကို အိန္ဒိယက မီဇိုရမ်ဒေသထဲမှာ ခိုလှုံခွင့်ပေးထားတယ်လို့ သိရပါတယ်။

ရခိုင်ပြည်နယ်က ပြဿနာတွေကြောင့် ရိုဟင်ဂျာဒုက္ခသည်တွေ အိန္ဒိယနိုင်ငံထဲ ၀င်မလာဖို့အတွက် တင်းကြပ်တဲ့ ဆောင်ရွက်မှုတွေလုပ်ဖို့ အိန္ဒိယ ပြည်ထဲရေးဝန်ကြီးဌာနက အရှေ့မြောက်ပိုင်း ပြည်နယ်တွေကို ညွှန်ကြားထားပေမယ့် အခု အုပ်စုကိုတော့ ခြွင်းချက်အဖြစ် ၀င်ခွင့်ပေးခဲ့တယ်လို့ ဆိုပါတယ်။

ချင်းလူမျိုးတွေနဲ့ အခြားလူမျိုးတွေအပါအ၀င် ဒီဒုက္ခသည် ၁၃၀၀ ဟာ မီဇိုရမ်ရဲ့ Lawngtlai ခရိုင်က ရွာ ၄ ရွာမှာ ခိုလှုံနေတာဖြစ်ပြီး၊ ဒုက္ခသည်တွေနဲ့ ဒေသခံတွေအကြားမှာ တင်းမာမှုတွေ မြင့်တက်လာတာကို ဖြေရှင်းဖို့ အာဏာပိုင်တွေက ရုန်းကန်နေရတယ်လို့ မီဇိုရမ် အစိုးရ ရင်းမြစ်တွေက ဆိုပါတယ်။

Lawngtlai ခရိုင်က လက်ထောက်ကော်မရှင်နာမင်းကြီး တီ အာရွန်က လွန်ခဲ့တဲ့ ၆ ရက်လောက်ကတည်းက ဒီဒုက္ခသည်တွေ ရောက်လာတာဖြစ်ပြီး ဗုဒ္ဓဘာသာဝင်တွေရဲ့အိမ်တွေ၊ ဘုန်းကြီးကျောင်းတွေနဲ့ အခြားနေရာတွေမှာ ခိုလှုံနေကြောင်း၊ လုံခြုံရေးဆိုင်ရာ ခြိမ်းခြောက်မှုရှိတယ်ဆိုတာ မငြင်းနိုင်ပေမယ့် လူသားချင်း စာနာထောက်ထားမှု ရှုထောင့်ကနေ အစားအသောက်တွေ ထောက်ပံ့ပေးတာ၊ ကျန်းမာရေး စစ်ဆေးပေးတာတွေ လုပ်ထားကြောင်း၊ လုံခြုံရေးအတွက်လည်း ရဲတပ်ဖွဲ့ဝင်တွေကို ထပ်တိုးချထားကြောင်း ပြောကြားခဲ့ပါတယ်။

“ပြဿနာက ရွာတစ်ရွာမှာ လူက ၂၀၀ ကနေ ၄၀၀ လောက်ပဲ ရှိတာဖြစ်ပြီး ဒီလောက် လူများများ ရောက်လာတဲ့အပေါ် တော်တော်လေး စိုးရိမ်မကင်းဖြစ်မှုတွေ ရှိနေပါတယ်” လို့ အာရွန်က ဆိုပါတယ်။

မီဇိုရမ် ရဲတပ်ဖွဲ့ အကြီးအကဲကတော့ လက်ရှိအခြေအနေမှာ လုံခြုံရေးအရ ခြိမ်းခြောက်မှုမျိုးအဖြစ် မရှုမြင်သေးဘဲ မြန်မာနိုင်ငံမှာ အခြေအနေကောင်းရင် သူတို့ဟာ ပြန်သွားကြမှာဖြစ်တယ်လို့ ဆိုပါတယ်။

“ဒီကိစ္စကို ကျွန်တော်တို့ ဂရုစိုက်ပြီး ရဲတွေလည်း ချထားပေးပါတယ်။ ဒါပေမယ့် ဒုက္ခသည်တွေကြောင့် ရွာသားတွေ ဒုက္ခမရောက်အောင်တော့ သေသေချာချာလေး လုပ်ပေးထားပါတယ်။ အဲဒီဒုက္ခသည်တွေဟာ ရွာ ၄ ရွာမှာ နေထိုင်နေကြတာပါ”

ရခိုင်ပြည်နယ်က ထွက်ပြေးရတဲ့ ရိုဟင်ဂျာ ဒုက္ခသည်တွေလည်း အိန္ဒိယမှာ ရှိနေပြီး အိန္ဒိယအစိုးရကတော့ လုံခြုံရေး စိုးရိမ်ရတဲ့အတွက် မြန်မာနဲ့ ကပ်နေတဲ့ နယ်စပ်တွေကို ပိတ်ထားဖို့ ပြည်နယ်တွေကို ညွှန်ကြားထားပါတယ်။

Ref: Economic Times