ဂျေရုစလင်အတွက် လိုအပ်လျှင် စစ်တပ်အဆင်သင့်ဟု မလေးရှားပြော

ဒီဇင်ဘာ ၁၀၊ ၂၀၁၇
M-Media

– ဂျေရုစလင်ကိစ္စနှင့် ပတ်သက်၍ လိုအပ်လာပါက တာဝန်ထမ်းဆောင်ရန် မလေးရှား စစ်တပ်မှာ အဆင်သင့်ရှိနေသည်ဟု ကာကွယ်ရေးဝန်ကြီး ဟီရှာမူဒင် ဟူစိန်က ပြောကြားလိုက်သည်။

“ဘယ်လိုဖြစ်နိုင်ချေမျိုးအတွက်မဆို ကျွန်တော်တို့ ပြင်ဆင်ထားရပါမယ်။ မလေးရှား လက်နက်ကိုင်တပ်ဖွဲ့တွေဟာ အမြဲတမ်း အဆင်သင့်ဖြစ်နေပြီး ခေါင်းဆောင်ပိုင်းရဲ့ ညွှန်ကြားချက်ကိုသာ စောင့်နေတာပါ။ ဒီပြဿနာဟာ တိုက်ရခိုက်ရတဲ့အထိ ဖြစ်မလာဖို့ ဆုတောင်းကြပါ” ဟု ဟီရှာမူဒင်၏ ပြောကြားမှုကို မလေးရှား သတင်းဌာန Bernama က ဖော်ပြခဲ့သည်။

ဗုဒ္ဓဟူးနေ့တွင် အမေရိကန်သမ္မတ ဒေါ်နယ်ထရမ့်က ဂျေရုစလင်အား အစ္စရေး၏ မြို့တော်အဖြစ် အသိအမှတ်ပြုကြောင်း ကြေငြာခဲ့ပြီးနောက် ကမ္ဘာတစ်ဝှမ်းမှ ထရမ့်ကို ရှုတ်ချမှုများ၊ ထိုဆုံးဖြတ်ချက်အား ဆန့်ကျင်ဆန္ဒပြမှုများ ပြုလုပ်ခဲ့ကြသည်။

ဟီရှာမူဒင်က ထရမ့်၏ ထိုလုပ်ရပ်မှာ မွတ်စလင်ကမ္ဘာတစ်ခုလုံးကို စော်ကားခြင်းဖြစ်သည်ဟု ထည့်သွင်း ပြောဆိုခဲ့သည်။

အင်ဒိုနီးရှားနိုင်ငံ ဂျကာတာရှိ အမေရိကန်သံရုံးရှေ့တွင် အင်ဒိုနီးရှားပြည်သူ တစ်သောင်းခန့်က ပါလက်စတိုင်းများကို ထောက်ခံကြောင်း ယနေ့တွင် ဆန္ဒပြခဲ့ကြသည်။

Ref: Aljazeera