ယီမင်ပြည်သူ ၈ သန်းကျော်မှာ မကြာမီ အငတ်ဘေးနှင့် ရင်ဆိုင်ရမည်ဟု ကုလပြော

ဒီဇင်ဘာ ၁၂၊ ၂၀၁၇
M-Media

– ယီမင်နိုင်ငံရှိ ပြည်သူ ၈ သန်းကျော်မှာ အငတ်ဘေးနှင့် မကြာခင်ရင်ဆိုင်ရတော့မည်ဟု ကုလက ပြောကြားလိုက်ပြီး လူသားချင်း စာနာထောက်ထားမှုဆိုင်ရာ အကူအညီများကို အဟန့်အတားမရှိ ၀င်ရောက်ခွင့်ပေးရန် စစ်ပွဲတွင် ပါဝင်နေသူများကို တိုက်တွန်းလိုက်သည်။

“အငတ်ဘေးဆိုက်ဖို့ နည်းနည်းသာလိုတော့တဲ့ ယီမင်ပြည်သူ ၈.၄ သန်းအပါအ၀င် လူသန်းပေါင်းများစွာရဲ့ ဘ၀ဟာ ကျွန်တော်တို့ရဲ့ လုပ်ငန်းတွေ ဆက်လက်လုပ်ကိုင်နိုင်မှု၊ ကျန်းမာရေး၊ သန့်ရှင်းတဲ့ရေ၊ နေထိုင်စရာ၊ အဟာရထောက်ပံ့မှုတွကို ဆက်လက်ပေးနိုင်စွမ်းအပေါ်မှာ မူတည်နေပါတယ်” ဟု ယီမင်ရှိ ကုလ လူသားချင်းစာနာထောက်ထားမှုဆိုင်ရာ ညှိနှိုင်းရေးမှူး မက်ဂိုးလ်ဒ်ရစ်က ယမန်နေ့တွင် ထုတ်ပြန်သော ကြေငြာချက်၌ ဖော်ပြထားသည်။

ဆော်ဒီဦးဆောင်သည့် မဟာမိတ်အဖွဲ့က အောက်တိုဘာလမှစ၍ ပြုလုပ်ထားသည့် ယီမင်အား ပိတ်ဆို့မှု ဆက်လက်ရှိနေစဉ် ကုလ၏ ယခုတိုက်တွန်းမှု ပေါ်ထွက်လာခြင်းဖြစ်သည်။ ဟူသီသူပုန်များက ရီယာ့ဒ်သို့ ဒုံးကျည်ဖြင့် ပစ်ခတ်မှုပြီးနောက် ဆော်ဒီက ထိုကဲ့သို့ ပိတ်ဆို့ခြင်းဖြစ်သည်။

နိုင်ငံတကာ ဖိအားများကြောင့် ဆော်ဒီက နိုဝင်ဘာ နောက်ဆုံးသီတင်းပတ်မှစ၍ ယီမင်တွင် လူသားချင်းစာနာထောက်ထားမှုဆိုင်ရာ အကူအညီတစ်ချို့ကို ၀င်ရောက်ခွင့်ပြုခဲ့သော်လည်း ယီမင်ပြည်သူများ၏ အခြေအနေမှာ ဆိုးရွားနေဆဲဖြစ်သည်။

၂၀၁၁ ခုနှစ် ပြည်သူလူထု အုံကြွမှုနောက်ပိုင်း အာရပ်ဒေသ၏ အဆင်းရဲဆုံး ယီမင်နိုင်ငံတွင် တိုက်ခိုက်မှုများ ဆက်တိုက်ဖြစ်ပွားခဲ့ပြီး လူပေါင်း တစ်သောင်းကျော် သေဆုံးကာ ၃ သန်းခန့် အိုးအိမ်စွန့်ခွာ ထွက်ပြေးရသည်ဟု ကုလ၏ မှတ်တမ်းများက ဆိုသည်။

Ref: Aljazeera