ရိုဟင်ဂျာများ နေရပ်ပြန်ပို့ရေး အလုပ်အဖွဲ့ကို မြန်မာ-ဘင်္ဂလားဒေ့ရှ် ပူးပေါင်းဖွဲ့စည်း

ဒီဇင်ဘာ ၁၉၊ ၂၀၁၇
M-Media

ဘင်္ဂလားဒေ့ရ်ှမှ ရိုဟင်ဂျာ ဒုက္ခသည်စခန်း

– ရိုဟင်ဂျာ ဒုက္ခသည်တွေ နေရပ်ပြန်ရေးကိစ္စ စောင့်ကြည့်လုပ်ကိုင်သွားဖို့အတွက် ပူးတွဲအလုပ်အဖွဲ့တစ်ခုကို မြန်မာနဲ့ ဘင်္ဂလားဒေ့ရ်ှတို့က ဒီနေ့မှာ ဖွဲ့စည်းလိုက်ပါတယ်။

ဒါကာမှာ လက်မှတ်ရေးထိုးခဲ့တဲ့ ဒီအဖွဲ့မှာ အဖွဲ့ဝင် ၃၀ ပါဝင်ပြီး ဒုက္ခသည်တွေ ကိုယ့်သဘောဆန္ဒအတိုင်း နေရပ်ပြန်ဖို့၊ ပြန်လည်နေရာချထားဖို့၊ လူ့အဖွဲ့အစည်းအတွင်း ပြန်လည်ပါဝင်နိုင်ဖို့ လုပ်ငန်းစဉ်တွေကို ချမှတ်သွားမှာပါ။

သြဂုတ်လနှောင်းပိုင်းကစပြီး ရခိုင်ပြည်နယ်မှာ တစ်ကျော့ပြန်ဖြစ်ပွားခဲ့တဲ့ မတည်ငြိမ်မှုကြောင့် ရိုဟင်ဂျာ ၆ သိန်း ၃ သောင်းကျော်လောက်ဟာ ဘင်္ဂလားဒေ့ရ်ှဖက်ကို ထွက်ပြေးခဲ့ရပါတယ်။

ဒီလူတွေ နေရပ်ပြန်ရေးအတွက် သဘောတူညီချက်တစ်ခုကို ဇန်န၀ါရီ ၂၁ ရက်နေ့မှာ စတင်နိုင်ဖို့ ဘင်္ဂလားဒေ့ရ်ှနဲ့ မြန်မာနိုင်ငံတို့အကြား ပြီးခဲ့တဲ့လမှာ သဘောတူခဲ့ကြပေမယ့် အမှန်တကယ် လုပ်ငန်းစတင်ဖို့ကတော့ အချိန်အတိုင်းအတာတစ်ခုအထိ ကြာမြင့်ဖွယ်ရှိနေတယ်လို့ ဒီနေ့ အစည်းအဝေးကို တက်ရောက်ခဲ့တဲ့ ဘင်္ဂလားဒေ့ရှ် နိုင်ငံခြားရေးဌာနရဲ့ တာဝန်ရှိသူတစ်ယောက်က ပြောကြားခဲ့ပါတယ်။

နေရပ်ပြန်လာတဲ့ ရိုဟင်ဂျာတွေဟာ အကြမ်းဖက်မှုတွေကို ဆက်လက်ရင်ဆိုင်ရနိုင်တယ်ဆိုပြီး လူ့အခွင့်အရေးအဖွဲ့တွေက သတိပေးထားပါတယ်။

အရင်ကလည်း မြန်မာစစ်တပ်ရဲ့ ညှင်းပမ်းနှိပ်စက်မှုတွေကြောင့် ရိုဟင်ဂျာတွေ ဘင်္ဂလားဒေ့ရ်ှဖက် ထွက်ပြေးရတဲ့ အခြေအနေတွေ ရှိခဲ့ပြီး ၁၉၉၂ ခုနှစ်မှာ အဲဒီလူတွေ နေရပ်ပြန်ရေး သဘောတူညီချက်ကို နှစ်နိုင်ငံက လက်မှတ်ရေးထိုးခဲ့ပါတယ်။ ဒါပေမယ့် အောင်မြင်အောင် ဆောင်ရွက်နိုင်ခြင်း မရှိပါဘူး။

အခုသဘောတူညီချက်ကလည်း ၁၉၉၂ ခုနှစ်က စည်းကမ်းတွေကို အခြေခံတာ ဖြစ်ပါတယ်။

Ref: Washington Post