ရခိုင်ကိစ္စအတွက် မြန်မာဗိုလ်ချုပ်တစ်ဦးကို အမေရိကန်က စတင် ပိတ်ဆို့အရေးယူ

ဒီဇင်ဘာ ၂၂၊ ၂၀၁၇
M-Media

ဗိုလ်ချုပ်မောင်မောင်စိုး (Photo Credit – VOA)

– ‘ဆိုးဆိုးရွားရွား လူ့အခွင့်အရေးချိုးဖောက်မှုတွေ၊  ခြစားမှုတွေနဲ့’ ပတ်သက်ပြီး မြန်မာဗိုလ်ချုပ်တစ်ယောက်အပါအ၀င် လူ ၁၃ ဦးကို အမေရိကန်က မနေ့မှာ အရေးယူပိတ်ဆို့မှုတွေ ပြုလုပ်လိုက်ပါတယ်။

မြန်မာနိုင်ငံက အရေးယူခံရသူဟာ အနောက်ပိုင်းတိုင်းစစ်ဌာနချုပ် တိုင်းမှူးဟောင်းဖြစ်တဲ့ ဗိုလ်ချုပ်မောင်မောင်စိုးဖြစ်ပြီး ရခိုင်ပြည်နယ်ကနေ ရိုဟင်ဂျာ ၆၅၀၀၀၀ ကျော်လောက် ထွက်ပြေးခဲ့ရတဲ့ သြဂုတ်လ ၂၅ ရက်နေ့နောက်ပိုင်း စစ်တပ်ရဲ့ နယ်မြေရှင်းလင်းမှုကို တာဝန်ယူရသူ ဖြစ်ပါတယ်။

မြန်မာလုံခြုံရေးတပ်ဖွဲ့တွေဟာ ရိုဟင်ဂျာအရပ်သားတွေကို တရားလက်လွတ်သတ်ဖြတ်တာ၊ လိင်အကြမ်းဖက်တာ၊ ထင်ရာစိုင်းဖမ်းဆီးတာနဲ့ ရိုဟင်ဂျာရွာတွေကို မီးရှို့ဖျက်ဆီးတာတွေ လုပ်တယ်ဆိုတဲ့ စွပ်စွဲချက်တွေအပါအ၀င် ဗိုလ်ချုပ်မောင်မောင်စိုး တာဝန်ခံရမယ့် လုပ်ရပ်တွေနဲ့ပတ်သက်ပြီး ခိုင်လုံတဲ့ အထောက်အထားတွေကို မိမိတို့က တွေ့ရှိခဲ့တဲ့အတွက် ဒီလို အရေးယူပိတ်ဆို့မှု ပြုလုပ်လိုက်တာဖြစ်တယ်လို့ အမေရိကန် ဘဏ္ဍာရေးဝန်ကြီးဌာနက မနေ့မှာ ထုတ်ပြန်ပြောကြားခဲ့ပါတယ်။

ဗိုလ်ချုပ်မောင်မောင်စိုးဟာ ပြီးခဲ့တဲ့ နိုဝင်ဘာလမှာ ရာထူးကနေ ရုတ်ရက် ဖယ်ရှားခံလိုက်ရပြီး ဗိုလ်မှူးချုပ် စိုးတင့်နိုင်ငံက သူ့နေရာကို ဆက်ခံခဲ့ပါတယ်။

ပြီးခဲ့တဲ့နှစ်က ပြဌာန်းခဲ့တဲ့ ဥပဒေနဲ့ ပထမဆုံးပြုလုပ်တဲ့ အရေးယူမှုမှာ ပါဝင်သူတွေဟာ အမေရိကန်ရဲ့ တရားစီရင်ရေးနယ်ပယ်အတွင်းမှာရှိတဲ့ ပိုင်ဆိုင်မှုတွေ အသိမ်းခံရမှာဖြစ်ပြီး၊ အမေရိကန်နိုင်ငံသားတွေနဲ့ ထိတွေ့ဆက်ဆံခွင့်၊ အမေရိကန်ဘဏ္ဍာရေးစနစ်မှာ ပါဝင်ခွင့်တွေ ဆုံးရှုံးမှာ ဖြစ်ပါတယ်။

ဗိုလ်ချုပ်မောင်မောင်စိုးအပါအ၀င် တောင်ဆူဒန်သမ္မတ ဆလ်ဗာ ကီရ်ရဲ့ အကြံပေးအဖြစ် ဆောင်ရွက်ခဲ့ဖူးတဲ့ ဘင်ယာမင် ဘိုမဲလ်၊ ဂမ်ဘီယာအာဏာရှင်ဟောင်း ယာယာဂျာမေဟ်၊ အစ္စရေး ဘီလီယံနာ ဒန် ဂျာတလာနဲ့ ကွန်ဂိုသမ္မတ ဂျိုးဆက်ဖ် ကာဘီလာတို့လည်း အမေရိကန်ရဲ့ အရေးယူမှုမှာ ပါဝင်ပါတယ်။

“ကျွန်တော်တို့ဟာ ရှေ့ဆောင်လမ်းပြအနေနဲ့ ဦးဆောင်ရမှာပါ။ ဒီကနေ့ ကြေငြာလိုက်တဲ့ ပိတ်ဆို့မှုက အမေရိကန်ဟာ လူ့အခွင့်အရေးကို ဆိုးဆိုးဝါးဝါးချိုးဖောက်သူတွေ၊ ခြစားမှုမှာ ပါဝင်သူတွေအနေနဲ့ သူတို့ရဲ့ ကျူးလွန်မှုတွေကို အမှန်တကယ် ခံစားရအောင် အမေရိကန်က ဆက်လက်ဆောင်ရွက်သွားမယ်ဆိုတာကို ပြသလိုက်တာလည်း ဖြစ်ပါတယ်” လို့ အမေရိကန်နိုင်ငံခြားရေးဝန်ကြီး ရက်စ်တီလာဆန်က ပြောကြားခဲ့ပါတယ်။

Ref: Reuters