နိုင်ငံအတွင်း မိမိသဘောဖြင့် စစ်ဆင်ရေးမလုပ်ရန် အမေရိကန်ကို ပါကစ္စတန် သတိပေး

ဒီဇင်ဘာ ၂၉၊ ၂၀၁၇
M-Media

– မိမိတို့နယ်နမိတ်အတွင်း လက်နက်ကိုင်အဖွဲ့များကို တုန့်ပြန်ရာ၌ မိမိတို့ကို အသိမပေးဘဲ မဆောင်ရွက်ရန် ပါကစ္စတန်စစ်တပ်က အမေရိကန်ကို သတိပေးခဲ့ပြီး မဟာမိတ်နှစ်နိုင်ငံအကြား တင်းမာမှုတွင် ပါကစ္စတန်၏ ပြင်းထန်သော တုန့်ပြန်မှုလည်းဖြစ်သည်။

ယမန်နေ့က ရ၀ါလ်ပင်ဒီ စစ်တပ်မြို့တွင် ဂျာနယ်လစ်များအား ဖြေကြားရာ၌ ပါကစ္စတန်စစ်တပ်၏ ပြောရေးဆိုခွင့်ရှိသူ ဗိုလ်ချုပ် အာဆစ်ဖ် ဂါဖူးရ်က လက်နက်ကိုင်တပ်ဖွဲ့များကို ပါကစ္စတန်က ထိထိရောက် ချေမှုန်းနိုင်ခြင်းမရှိဆိုသော ပြောကြားမှုများကို ပယ်ချခဲ့သည်။

“ကျွန်တော်တို့ အများကြီး စွန့်လွှတ်စတေးခဲ့ပါတယ်။ အသက်သွေးချွေးတွေ၊ ငွေကြေးတွေ အမြောက်အများ ကျွန်တော်တို့ ပေးဆပ်ခဲ့ရတာပါ။ ကျွန်တော်တို့ ထိထိရောက်ရောက် လုပ်ခဲ့တာဖြစ်ပြီး ဘယ်သူ့အတွက် ဘာမှ ထပ်မလုပ်ပေးနိုင်တော့ပါဘူး”

ထို့ပြင် လက်နက်ကိုင်များကို အခြားနိုင်ငံများ၏ကိုယ်စား တိုက်ခိုက်ပေးခြင်းထက် မိမိတို့၏ အကျိုးအတွက်သာ ပါကစ္စတန်က တိုက်ခိုက်သွားမည်ဖြစ်ကြောင်း၊ မိမိတို့၏ အကူအညီသာ မပါလျှင် အလ်ကိုင်းဒါးကို အမေရိကန်က ချေမှုန်းနိုင်မည်မဟုတ်ကြောင်း ဂါဖူးရ်က ထည့်သွင်း ပြောဆိုခဲ့သည်။

၂၀၀၇ ခုနှစ်ကတည်းက ပါကစ္စတန်မှာ တာလီဘန်အပါအ၀င် လက်နက်ကိုင်အဖွဲ့ အများအပြားကို ရင်ဆိုင်ခဲ့ရပြီး၊ တာလီဘန်က ထိန်းချုပ်ထားသည့် ဒေသများကို ပြန်လည်ရရှိရေးအတွက် စစ်ဆင်ရေးများစွာ ပြုလုပ်ခဲ့ရသည်။

Ref: Aljazeera