ဂျေရုစလင်မှာ ရောင်းစားရန်မဟုတ်ဟု ပါလက်စတိုင်းက အမေရိကန်၏ ခြိမ်းခြောက်မှုကို တုန့်ပြန်

ဇန်န၀ါရီ ၃၊ ၂၀၁၈
M-Media

– ဂျေရုစလင်ဟာ ‘ရောင်းစားဖို့မဟုတ်’ လို့ ပါလက်စတိုင်း သမ္မတရုံးက ဒီကနေ့မှာ ထုတ်ပြန် ပြောကြားလိုက်ပြီး အမေရိကန်သမ္မတက ဒေါ်နယ်ထရမ့်က ပါလက်စတိုင်းကို ပေးအပ်နေတဲ့ အကူအညီ ဖြတ်တောက်မယ်ဆိုတဲ့ ခြိမ်းခြောက်မှုကို တုန့်ပြန်လိုက်တာ ဖြစ်ပါတယ်။

“ဂျေရုစလင်ဟာ ပါလက်စတိုင်းနိုင်ငံရဲ့ ထာဝရမြို့တော် ဖြစ်ပါတယ်။ ရွှေ၊ ဘီလီယံဒေါ်လာတွေနဲ့ ရောင်းစားရမယ့်အရာ မဟုတ်ပါဘူး” လို့ ပါလက်စတိုင်းသမ္မတ မဟ်မူးဒ်အဘတ်စ်ရဲ့ ပြောရေးဆိုခွင့်ရှိသူ နဘီလ် အဘူ ရူဒီနာက AFP သတင်းဌာနကို ပြောကြားခဲ့ပါတယ်။

ထရမ့်ဟာ ဂျေရုစလင်ကို အစ္စရေးမြို့တော်အဖြစ် အသိအမှတ်ပြုကြောင်း ဒီဇင်ဘာ ၆ ရက်နေ့မှာ ကြေငြာခဲ့ပြီးတဲ့နောက် အမေရိကန်ဟာ အရှေ့အလယ်ပိုင်း ငြိမ်းချမ်းရေးလုပ်ငန်းစဉ်မှာ အလုပ်မဖြစ်တော့ဘူးလို့ ပါလက်စတိုင်းအာဏာပိုင်အဖွဲ့က တုန့်ပြန်ခဲ့ပါတယ်။

ထရမ့်က သူတို့အနေနဲ့ ပါလက်စတိုင်းကို ဒေါ်လာသန်းနဲ့ချီ ပေးထားပေမယ့် ပါလက်စတိုင်းက သူတို့ကို လေးစားမှုမရှိဘဲ၊ ငြိမ်းချမ်းရေးအတွက် ဆွေးနွေးညှိနှိုင်းမှု မလုပ်ချင်ဘူးဆိုရင် ဘာ့ကြောင့် အကူအညီတွေ ပေးရမလဲဆိုတဲ့ သဘောထားမျိုးကို မနေ့က Twitter စာမျက်နှာမှာ ရေးသားခဲ့တာ ဖြစ်ပါတယ်။

၂၀၁၆ ခုနှစ်အတွင်းမှာ ပါလက်စတိုင်းကို အကူအညီ ကန်ဒေါ်လာ ၃၁၉ သန်း ပေးခဲ့တယ်လို့ အမေရိကန်အစိုးရ စာရင်းအင်းတွေအရ သိရပြီး ဒီပမာဏကို ထရမ့်က ရည်ညွှန်းတာလားဆိုတာ တိတိကျကျ မသိရပါဘူး။

“ဆွေးနွေးညှိနှိုင်းမှုတွေကို ကျွန်တော်တို့ ကျောခိုင်းသွားမှာ မဟုတ်ပါဘူး။ ဒါပေမယ့် ဒါဟာ အရှေ့ဂျေရုစလင်ကို မြို့တော်ထားပြီး လွတ်လပ်တဲ့ ပါလက်စတိုင်းနိုင်ငံအဖြစ် အသိအမှတ်ပြုတဲ့ နိုင်ငံတကာ ဥပဒေတွေ၊ ဆုံးဖြတ်ချက်တွေကို အခြေခံတဲ့ ဆွေးနွေးမှုမျိုး ဖြစ်ရပါမယ်” လို့ ရူဒီနာက ထည့်သွင်း ပြောဆိုခဲ့ပါတယ်။

Ref: Alarabiya