ရိုဟင်ဂျာဒုက္ခသည်အားလုံး ၂ နှစ်အတွင်း နေရပ်ပြန်ရေး မြန်မာနှင့် ဘင်္ဂလားဒေ့ရ်ှတို့ သဘောတူ

ဇန်န၀ါရီ ၁၆၊ ၂၀၁၈
M-Media

ဘင်္ဂလားဒေ့ရ်ှရောက် ရိုဟင်ဂျာဒုက္ခသည် ကလေးငယ်

– ဘင်္ဂလားဒေ့ရ်ှရောက် ရိုဟင်ဂျာဒုက္ခသည်တွေ ၂ နှစ်အတွင်း အပြီး နေရပ်ပြန်နိုင်ဖို့အတွက် မြန်မာနဲ့ ဘင်္ဂလားဒေ့ရ်ှတို့ဟာ ဒီကနေ့မှာ သဘောတူခဲ့ပါတယ်။

နှစ်နိုင်ငံ နိုင်ငံခြားရေး ၀န်ကြီးဌာနတွေက ထုတ်ပြန်တဲ့ကြေငြာချက်တွေမှာ ဘင်္ဂလားဒေ့ရ်ှဖက်က သူတို့ရဲ့ နယ်စပ်မှာ တစ်ဆင့်လွှဲပြောင်းပေးမယ့် ယာယီစခန်း ၅ ခု ဖန်တီးကာ မြန်မာနိုင်ငံက လက်ခံရေးစင်တာ ၂ ခုကို လွှဲပြောင်းပေးသွားမယ်လို့ ဖော်ပြထားပါတယ်။

ပထမဆုံး နေရပ်ပြန်ပို့မှုကို လာမယ့် အင်္ဂါနေ့မှာ စတင်မယ်လို့လည်း ဆိုပါတယ်။

မြန်မာအစိုးရက လူပေါင်း ၃၀၀၀၀ လောက် နေထိုင်နိုင်မယ့် ယာယီစခန်း တစ်ခုကို တည်ဆောက်ပေးမယ်လို့ ပြောကြားခဲ့ပါတယ်။

ဘင်္ဂလားဒေ့ရ်ှက ထုတ်ပြန်တဲ့ကြေငြာချက်မှာ ‘မြန်မာနိုင်ငံဟာ သူတို့နိုင်ငံအတွင်း နေထိုင်သူတွေ ဘင်္ဂလားဒေ့ရ်ှဖက် ထွက်ပြေးမှုကို ရပ်တန့်သွားမယ်ဆိုတဲ့ ကတိက၀တ် ထပ်ပေးခဲ့တယ်’ လို့ ဖော်ပြထားပါတယ်။

မြန်မာဖက်ကတော့ ဖြစ်လာနိုင်တဲ့ ရိုဟင်ဂျာတွေရဲ့ တိုက်ခိုက်မှုတွေအတွက် ကြိုတင်ကာကွယ်မှုတွေ နှစ်ဖက်စလုံး လုပ်ဆောင်ဖို့ လိုအပ်တယ်ဆိုတာကို အလေးထားပြောကြားခဲ့ပြီး၊ စစ်သွေးကြွလို့ဆိုတဲ့ လူ ၁၀၀၀ စာရင်းကို ပေးခဲ့ပါတယ်။

သြဂုတ်လနှောင်းပိုင်းမှာ ရိုဟင်ဂျာလက်နက်ကိုင်အဖွဲ့က ရဲကင်းစခန်းတွေကို တိုက်ခိုက်ပြီးနောက်ပိုင်း မြန်မာစစ်တပ်က ပြုလုပ်တဲ့ နယ်မြေရှင်းလင်းရေးကြောင့် ရိုဟင်ဂျာ ၆၅၀၀၀၀ ကျော်လောက် ထွက်ပြေးခဲ့ရပါတယ်။

ဘင်္ဂလားဒေ့ရ်ှက ရိုဟင်ဂျာဒုက္ခသည်တွထဲက မိဘမဲ့တွေ၊ ‘မလိုလားအပ်တဲ့ အခြေအနေမျိုးတွေကနေ မွေးဖွားခဲ့တဲ့ ကလေးတွေ’ ကို လက်ခံဖို့လည်း မြန်မာဖက်ကို တိုက်တွန်းခဲ့တယ်လို့ အမည်မဖော်လိုတဲ့ ဘင်္ဂလားဒေ့ရ်ှနိုင်ငံခြားရေးဝန်ကြီးဌာန တာဝန်ရှိသူတစ်ဦးက ပြောကြားခဲ့ပါတယ်။ မလိုလားအပ်တဲ့ အခြေအနေမျိုးဆိုတာ အဓမ္မကျင့်မှုကြောင့် ကိုယ်ဝန်ရှိလာတာကို ရည်ညွှန်းတာ ဖြစ်ပါတယ်။

ရိုဟင်ဂျာအမျိုးသမီးတွေကို မြန်မာ လုံခြုံရေးတပ်ဖွဲ့တွေက အဓမ္မပြုကျင့်တယ်ဆိုတဲ့ သတင်းတွေ ကျယ်ကျယ်ပြန့်ပြန့် ထွက်ပေါ်ခဲ့ပြီး စစ်တပ်ကတော့ ဒီလုပ်ရပ်တွေမရှိဘူးလို့ ငြင်းဆိုပါတယ်။

Ref: Reuters