ယူအေအီး၏ တတိယမြောက် ပြည်တွင်းဖြစ် ဂြိုဟ်တုကို အောင်မြင်စွာလွှင်တင်နိုင်ခဲ့

ဇန်န၀ါရီ ၂၇၊ ၂၀၁၈
M-Media

– အာရပ်စော်ဘွားများပြည်ထောင်စု ယူအေအီးနိုင်ငံမှာ ၎င်းတို့၏ ပြည်တွင်းဖြစ် တတိယမြောက်ဆက်သွယ်ရေးဂြိုဟ်တုကို အောင်မြင်စွာ လွှတ်တင်နိုင်ခဲ့သည်ဟု သိရသည်။

Al Yah 3 ဟု အမည်ပေးထားသည့် အဆိုပါ ဂြိုဟ်တုကို အဘူဒါဘီအစိုးရ၏ ရင်းနှီးမြှုပ်နှံမှုလုပ်ငန်း Mubadala က ပိုင်ဆိုင်သည့် Yahsat မှ ထုတ်လုပ်ခဲ့ခြင်းဖြစ်ပြီး ဇန်န၀ါရီ ၂၅ ရက်နေ့ ညနေပိုင်းတွင် ပြင်သစ်ပိုင် ဂီနီကျွန်းမှ Ariane 5 ဒုံးပျံဖြင့် ပစ်လွှတ်ခဲ့သည်။

စောစောပိုင်းတွင် ဒုံးပျံမှာ အဆက်အသွယ် ပြတ်တောက်သည်ဟု သတင်းထွက်ခဲ့သော်လည်း နောက်ပိုင်းတွင် ဒုံးပျံဖြင့် ပါဝင်သွားသည့် Al Yah 3 ဂြိုဟ်တုနှင့် SES-14 ဂြိုဟ်တုတို့မှာ ထိန်းချုပ်စင်တာနှင့် အသီးသီး ချိတ်ဆက်မိသွားသည်ဟု သတင်းထုတ်ပြန်ခဲ့သည်။

Al Yah 3 ဂြိုဟ်တုမှာ အာဖရိကပြည်သူ ၆၀ ရာခိုင်နှုန်းနှင့် ဘရာဇီးလ်လူဦးရေ ၉၅ ရာခိုင်နှုန်းကို အင်တာနက်ဆယ်သွယ်မှု ပေးနိုင်မည်ဟု မျှော်မှန်းထားသည်။

ဂြိုဟ်တုအား တည်ဆောက်ရာတွင် ယူအေအီး သိပ္ပံပညာရှင်များလည်း ပါဝင်ခဲ့သည်။ Al Yah 3 မှာ Yahsat က ထုတ်လုပ်သည့် တတိယမြောက် ဂြိုဟ်တုဖြစ်ပြီး ၂၀၁၁ ခုနှစ်က Al Yah 1၊ ၂၀၁၂ ခုနှစ်တွင် Al Yah 2 တို့ကို အသီးသီး လွှတ်တင်နိုင်ခဲ့သည်။

Ref: KhaleejTimes