ဖေဖော်ဝါရီ ၁၊ ၂၀၁၈
M-Media
– လွတ်လပ်တဲ့ ပါလက်စတိုင်းနိုင်ငံထူထောင်ရေးမှာ အသုံးပြုဖို့အတွက် ကန်ဒေါ်လာ ၅၃ သန်းနီးပါး ထောက်ပံ့ပေးသွားမယ်လို့ ဥရောပသမဂ္ဂက မနေ့မှာ ကြငြာလိုက်ပါတယ်။
ဘရပ်ဆဲလ်မှာလုပ်တဲ့ ပါလက်စတိုင်း ဖွံ့ဖြိုးတိုးတက်ရေးမှုဆိုင်ရာ နိုင်ငံတကာ အကူအညီပေးရေးကော်မတီရဲ့ အရေးပေါ်အစည်းအဝေးမှာ ဥရောပသမဂ္ဂ နိုင်ငံခြားရေးအကြီးအကဲ ဖက်ဒရီကာ မိုဂ်ဟီရီနီက ဒီလိုပြောကြားလိုက်တာပါ။
အစ္စရေးနဲ့ ပါလက်စတိုင်းအကြား ငြိမ်းချမ်းရေးရဖို့ ကြိုးစားရာမှာ အမေရိကန်အနေနဲ့ တစ်ဖက်သတ်မလုပ်ဖို့ တိုက်တွန်းခဲ့ပြီး အဲဒီလိုလုပ်မယ်ဆိုရင် ဆုံးရှုံးမှုနဲ့သာ ရင်ဆိုင်ရမယ်လို့လည်း သတိပေးခဲ့ပါတယ်။
“ဘယ်လို ဆွေးနွေးညှိနှိုင်းမှု မူဘောင်မျိုးမဆို အများပါဝင်ဖို့၊ သက်ဆိုင်သူတွေအားလုံးနဲ့ ဒီကိစ္စမှာ အရေးပါသူတွေအားလုံး ပါဝင်ဖို့ လိုအပ်ပါတယ်။ တစ်ဦးတစ်ယောက် မပါဝင်ဘူးဆိုရင် ဒီလုပ်ငန်းစဉ်က အလုပ်ဖြစ်မှာ မဟုတ်သလို လက်တွေ့ကျမှာလည်း မဟုတ်ပါဘူး။ အမေရိကန်မပါရင်မဖြစ်သလို၊ အမေရိကန်တစ်နိုင်ငံတည်းနဲ့လည်း မဖြစ်ပါဘူး” လို့ ဖက်ဒရီကာက ပြောကြားခဲ့ပါတယ်။
အရေးပေါ်အစည်းအဝေးကို အစ္စရေးနဲ့ အီဂျစ်တို့က အစိုးရ၀န်ကြီးတွေ၊ ပါလက်စတိုင်းဝန်ကြီးချုပ်၊ အမေရိကန်အစိုးရက အကြီးတန်းတာဝန်ရှိသူတစ်ဦးတို့ တက်ရောက်ခဲ့ပါတယ်။
နိုင်ငံတကာ သဘောတူညီချက်တွေနဲ့ ဆန့်ကျင်ပြီး ဂျေရုစလင်ကို အစ္စရေးမြို့တော်အဖြစ် အမေရိကန်သမ္မတ ဒေါ်နယ်ထရမ့်က ကြေငြာခဲ့ပြီးနောက်ပိုင်း ဒီလိုအစည်းဝေးမျိုး ပထမဆုံး ပြုလုပ်တာ ဖြစ်ပါတယ်။
ဖက်ဒရီကာက လက်ရှိအနေအထားဟာ အရှေ့အလယ်ပိုင်းဒေသအတွက် ခက်ခဲတဲ့အခြေအနေမျိုးဖြစ်ကြောင်း၊ ဒီအစည်းအဝေးဟာ နှစ်နိုင်ငံတည်ရှိရေး အခြေခံတဲ့ အဖြေစ်တစ်ခုပေါ်ထွက်လာရေး တွန်းအားပေးဖို့ဖြစ်ကြောင်း ထည့်သွင်းပြောကြားခဲ့ပါတယ်။
အစည်းအဝေးအစမှာပဲ အီးယူက ပါလက်စတိုင်းတွေ မြို့တော်အဖြစ် သတ်မှတ်ချင်တဲ့ အရှေ့ဂျေရုစလင်ကို ရေရှည်ထောက်ပံ့ရေးအပါအ၀င် ပါလက်စတိုင်းအတွက် အကူညီပေးဖို့အစီအစဉ်ကို ကြေငြာခဲ့တာဖြစ်ပါတယ်။
ပါလက်စတိုင်းဒုက္ခသည်တွေကို ထောက်ပံ့ကူညီပေးနေတဲ့ ကုလရဲ့ UNRWA အဖွဲ့ကို ပံ့ပိုးနိုင်မယ့် နည်းလမ်းတွေကိုလည်း အစည်းအဝေးမှာ ဆွေးနွေးခဲ့ပါတယ်။
UNRWA ကို အဓိကကူညီနေတဲ့ အမေရိကန်ဟာ သူတို့ရဲ့ထည့်ဝင်ငွေကို လျှော့ချသွားမယ်လို့ ဒီဇင်ဘာမှာ ကြေငြာခဲ့ပြီးနာက်ပိုင်း ဒီအဖွဲ့ဟာ ဘဏ္ဍာရေးအကြပ်အတည်းနဲ့ ကြုံတွေ့နေရတာ ဖြစ်ပါတယ်။
Ref: Aljazeera