အရှေ့အလယ်ပိုင်း၏ ပထမဆုံး တီထွင်ဖန်တီးမှုစင်တာ ဒူဘိုင်းတွင် ဖွင့်လှစ်

ဖေဖော်ဝါရီ ၉၊ ၂၀၁၈
M-Media

– အရှေ့အလယ်ပိုင်းမှာ ပထမဆုံးဖြစ်တဲ့ လူငယ် သိပ္ပံနဲ့ နည်းပညာ တီထွင်ဖန်တီးမှုစင်တာတစ်ခုကို အာရပ်စော်ဘွားများပြည်ထောင်စု ယူအေအီးနိုင်ငံ ဒူဘိုင်းမြို့မှာ ဗုဒ္ဓဟူးနေ့က ဖွင့်လှစ်လိုက်ပါတယ်။

Innovation Hub လို့ အမည်ပေးထားတဲ့ အဲဒီသင်တန်းကျောင်းမှာ အက်ပလီကေးရှင်းတွေ၊ ကွန်ပျူတာပရိုဂရမ်တွေ၊ ဟက်ကင်းနည်းစနစ်တွေ၊ ဉာဏ်ရည်တု နည်းပညာတွေ စသဖြင့် နောက်ဆုံးပေါ် သိပ္ပံနဲ့ နည်းပညာဆိုင်ရာ နည်းလမ်းအသစ်တွေကို လေ့လာတီထွင်နိုင်မှာ ဖြစ်ပါတယ်။

အသက် ၈ နှစ်ကနေ ၂၄ နှစ်အထိ ကျောင်းသားပေါင်း ၁၂၀ လောက် တက်ရောက်နိုင်မှာဖြစ်ပြီး ဒေသတွင်း သိပ္ပံနဲ့ နည်းပညာပိုင်းမှာ ထိပ်တန်းအဆင့်ရောက်နိုင်ဖို့အတွက် ရည်ရွယ်တာဖြစ်ပါတယ်။

Al Bayt Mitwahid အသင်းရဲ့ ဥက္ကဌဖြစ်တဲ့ ဆအစ်ဖ် အလီ အလ် ကူဘိုင်စီက Google က ပံ့ပိုးတဲ့ Innovation Hub ကို ဖွင့်လှစ်နိုင်တဲ့အတွက် ဂုဏ်ယူမိကြောင်း ပြောကြားခဲ့ပါတယ်။

“ဒီစင်တာရဲ့ နောက်ဆုံးပေါ် ပစ္စည်းတွေက ကျောင်းသားတွေကို တန်ဖိုးရှိတဲ့ နည်းပညာမြင့် သင်တန်းတွေကို သင်ပေးနိုင်မှာဖြစ်ပြီး ယူအေအီးက ပါရမီရှိလူငယ်မျိုးဆက်သစ်အတွက် အကျိုးရှိစေမှာ ဖြစ်ပါတယ်”

ဒီစင်တာကို ယူအေအီးတက္ကသိုလ်၊ အဘူဒါဘီ ပညာရေးဌာနနဲ့ Google တို့က ပူးပေါင်းပြီး တည်ထောင်ထားတာဖြစ်ပါတယ်။

Ref: Khaleejtimes