ပါကစ္စတန်ရှိ ထိပ်တန်း လူ့အခွင့်အရေးလှုပ်ရှားသူ ကွယ်လွန်

ဖေဖော်ဝါရီ ၁၁၊ ၂၀၁၈
M-Media

– ပါကစ္စတန်ရှိ ထိပ်တန်း လူ့အခွင့်အရေးလှုပ်ရှားသူနှင့် ရှေ့နေတစ်ဦးဖြစ်သူ အသက် ၆၆ နှစ်အရွယ် အက်စ်မာ ဂျာဟန်ဂီရ်မှာ နိုင်ငံအရှေ့ပိုင်း လာဟိုးရ်မြို့တွင် ကွယ်လွန်သွားခဲ့သည်ဟု သိရသည်။

နှလုံးသွေးကြောပိတ်ရောဂါကြောင့် ယနေ့မနက်ပိုင်းက ဆေးရုံတွင် ကွယ်လွန်သွားခြင်းဖြစ်သည်ဟု ပြည်တွင်းသတင်းဌာနများက ဖော်ပြကြသည်။

“တိုင်းပြည်ရဲ့ ဒီမိုကရေစီ ခြိမ်းခြောက်ခံရတဲ့ အချိန်မှာတောင်မှ သူမဟာ ရဲရဲတောက်စကားတွေနဲ့ အမြဲတမ်း မားမားမတ်မတ် ရပ်တည်ခဲ့သူပါ။ မိတ်ဆွေရင်းတွေ ဖြစ်တာကြောင့် ကျွန်မတို့ဟာ ဆွေးနွေးငြင်းခုံမှုတွေ ရှိခဲ့တယ်။ ဒါပေမယ့် ၀ါနုသေးတဲ့ လူငယ်ဂျာနယ်လစ် ကျွန်မကို သူက လူ့အခွင့်အရေးနဲ့ မိတ်ဆက်ပေးခဲ့တာပါ။ ပါကစ္စတန်ရဲ့ အထက်မြတ်ဆုံးသူတွေထဲက တစ်ဦး အခုလို ကွယ်လွန်သွားမှုဟာ ကျွန်မတို့အတွက် တုန်လှုပ်စရာဖြစ်သလို နိုင်ငံတကာ လူ့အခွင့်အရေးအသိုင်းအ၀ိုင်းအတွက် ဆုံးရှုံးမှုကြီးတစ်ခုပါပဲ” ဟု ပါကစ္စတန်လွှတ်တော်မှ အတိုက်အခံ လွှတ်တော်အမတ် ရှယ်ရီ ရဟ်မန်က ပြောကြားခဲ့သည်။

အက်စ်မာ ဂျာဟန်ဂီရ်မှာ အမျိုးသမီးအခွင့်အရေး၊ လူနည်းစုများ ခွဲခြားခံရမှု တိုက်ဖျက်ရေးတို့ အပါအ၀င် လူ့အခွင့်အရေး ကိစ္စပေါင်းများစွာကို ဆောင်ရွက်မှုကြောင့် ပါကစ္စတန်နှင့် နိုင်ငံရပ်ခြားတွင်ပါ ထင်ရှားပြီး ပါကစ္စတန် တရားရုံးချုပ် ရှေ့နေများအသင်းတွင် ဥက္ကဌရာထူးရရှိခဲ့သည့် ပထမဆုံး အမျိုးသမီးလည်း ဖြစ်သည်။

သူမမှာ အသက်အန္တရာယ် ခြိမ်းခြောက်မှု၊ ထောင်သွင်းအကျဉ်းချခံရမှု၊ ရိုက်နှက်ခံရမှုတို့ကို အန်တုကာ ပါကစ္စတန် စစ်တပ်၊ ထောက်လှမ်းရေးနှင့် လက်နက်ကိုင်အုပ်စုများ၏ မသမာမှုများကို ဝေဖန် ဆန့်ကျင်ခဲ့သူဖြစ်သည်။

အလုပ်သမားအရေး၊ ဘာသာ သာသနာညှိုးနွမ်းစေမှုကို ဗန်းပြကာ တိုက်ခိုက်မှုများ ဆန့်ကျင်ရေးကိုလည်း သူမက လှုပ်ရှားခဲ့ပြီး ၂၀၀၇ ခုနှစ်တွင် စစ်အာဏာရှင် ပါဗက်ဇ် မူရှာရက်ဖ်၏ ဖမ်းဆီးမှုကို ခံခဲ့ရသည်။

“လူ့အခွင့်အရေးအတွက် တိုက်ပွဲဝင်ခဲ့တဲ့ အရဲရင့်ဆုံး သမီးတွေထဲကတစ်ယောက်ကို ဆုံးရှုံးလိုက်ရတဲ့အတွက် ပါကစ္စတန်ဟာ ကြေကွဲနေတော့မှာပါ။ ပါကစ္စတန်မှာ အမျိုးသမီးအခွင့်အရေး ခိုင်ခိုင်မာမာရှိဖို့ ကြိုးစားမှုတစ်လျှောက်လုံးမှာ သူမဟာ အမှတ်ရစရာအဖြစ် ရှိနေမှာဖြစ်ပါတယ်” ဟု ပန်ဂျပ်ဝန်ကြီးချုပ် ရှဲဟ်ဘက်ဇ် ရှရစ်ဖ်က ပြောကြားခဲ့သည်။

ဂျာဟန်ဂီရ်ကို ထောက်ခံသူများ၊ လုပ်ဖော်ကိုင်ဖက်များကလည်း သူမကွယ်လွန်မှုအတွက် ၀မ်းနည်းကြေကွဲရကြောင်း ဆိုရှယ်မီဒီယာတွင် ရေးသားခဲ့ကြသည်။

Ref: Aljazeera