နိုင်ငံအတွင်းရှိ တရုတ်လူ့အဖွဲ့အစည်းကို မလေးဝန်ကြီးချုပ် ချီးကျူး၊ မည်သည့်နိုင်ငံသားကိုမှ မခွဲခြားဟု ဆို

ဖေဖော်ဝါရီ ၁၅၊ ၂၀၁၈
M-Media

– လွတ်လပ်ရေးရပြီးနောက်ပိုင်း တိုင်းပြည်တည်ဆောက်ရေးမှာ နိုင်ငံအတွင်းက တရုတ်လူ့အဖွဲ့အစည်းဟာ အရေးပါတဲ့ အခန်းကဏ္ဍကနေ ပါဝင်ခဲ့တယ်လို့ မလေးရှားဝန်ကြီးချုပ် နာဂျစ်ရာဇတ်က မနေ့မှာ ပြောကြားလိုက်ပါတယ်။

တရုတ်နှစ်ကူး စကားလက်ဆောင်အဖြစ် သူ့ရဲ့ ဘလော့ဂ်စာမျက်နှာမှာ ရေးသားခဲ့တာဖြစ်ပြီး ယဉ်ကျေးမှုအရသော်လည်းကောင်း၊ စီးပွားရေးအရသော်လည်းကောင်း တရုတ်လူမျိုးတွေရဲ့ ကြီးမားတဲ့ ကူညီလုပ်ဆောင်ပေးမှုတွေကို နိုင်ငံရဲ့ နယ်ပယ်တိုင်းမှာ တွေ့ရတယ်လို့လည်း သူက ဆိုပါတယ်။

“တကယ်တော့ မလေးရှားဟာ ကြီးကျယ်တဲ့နိုင်ငံတစ်ခုဖြစ်အောင် တည်ဆောက်ရာမှာ အဓိကအခန်းကဏ္ဍက ပါဝင်ခဲ့ကြသူတွေရဲ့ ဇာတိပါ။ အထူးသဖြင့် မလေးရှားရဲ့ သားသမီးတွေဖြစ်ကြတဲ့ တရုတ်ညီအစ်ကို မောင်နှမတွေပါပဲ”

မလေးရှားနိုင်ငံသားတွေ ဘယ်သူ့ကိုမှ နောက်ကောက်ကျအောင် မထားခဲ့ဘူးလို့လည်း နာဂျစ်က ပြောပါတယ်။

“မလေးရှားနိုင်ငံသားတွေ ဘယ်သူမှ နောက်မှာ ကျန်မနေအောင်၊ ကျွန်တော်တို့ရဲ့ သားမြေးတွေရဲ့ အနာဂတ်ဟာ ကျွန်တော်တို့ထက် ပိုမိုကောင်းမွန်နေအောင် ဆောင်ရွက်သွားမယ်လို့ ကျွန်တော် စိတ်ပိုင်းဖြတ်ထားပါတယ်။ ကျွန်တော်တို့ဟာ စည်းလုံးပြီး ပိုမိုတောင့်တင်းတဲ့ နိုင်ငံတစ်ခုအဖြစ် ဆက်လက် ရှင်သန်သွားမှာပါ”

မလေးရှားမှာ ဘာသာရေးနဲ့ ယဉ်ကျေးမှုပွဲတော်တွေဟာ လူ့အဖွဲ့အစည်းတစ်ခုအတွက်သာ မဟုတ်ဘဲ နိုင်ငံသားတိုင်း ပျော်ရွှင်ကြည်နူးရတဲ့ ပွဲတော်တွေဖြစ်တယ်လို့လည်း နာဂျစ်က ထပ်လောင်းပြောကြားခဲ့ပါတယ်။

“ကျွန်တော်တို့ရဲ့ မတူကွဲပြားတဲ့ ရိုးရာယဉ်ကျေးမှုတွေ၊ အမြင်တွေနဲ့ ဘာသာစုံလူမျိုးစုံ တည်ရှိမှုဟာ ကျွန်တော်တို့ကို ထူးခြားအောင်၊ လန်းဆန်းအောင်၊ လှုပ်ရှားရှင်သန်နေအောင် လုပ်ဆောင်ပေးတာဖြစ်ပါတယ်”

Ref: CNA