စစ်ဖက်၊ အရပ်ဖက် ထိပ်တန်းရာထူးများကို ဆော်ဒီ အပြောင်းအလဲပြုလုပ်

ဖေဖော်ဝါရီ ၂၇၊ ၂၀၁၈
M-Media

ဆော်ဒီဘုရင် ဆလ်မန်

– ဆော်ဒီဘုရင် ဆလ်မန်မှာ ထိပ်တန်း စစ်ဖက်အရာရှိများနှင့် အစိုးရ၀န်ကြီးများကို ယမန်နေ့က အပြောင်းအလဲလုပ်ခဲ့သည်ဟု သိရသည်။

ရာထူးအပြောင်းအလဲတွင် စစ်ဦးစီးအရာရှိချုပ် (ကြည်း)၊ ကြည်းတပ်နှင့် လေတပ်တို့မှ ထိပ်တန်းခေါင်းဆောင်များ ပါဝင်ခဲ့သည်။

ဒုတိယဗိုလ်ချုပ်ကြီး ဖေယဒ် ဘင် ဟာမဒ် အလ်-ရူဝေလီကို စစ်ဦးစီးအရာရှိချုပ်သစ်အဖြစ် ခန့်အပ်ခဲ့ပြီး၊ အမျိုးသမီးတစ်ဦးဖြစ်သူ တာမာဒူရ် ဘင်တီ ယူဆွဖ် အလ်-ရာမာကို အလုပ်သမားရေးရာ ဒုတိဝန်ကြီးအဖြစ် ခန့်အပ်ခဲ့သည်။

အမျိုးသမီးများကို ထိုကဲ့သို့ ထိပ်တန်းရာထူးများ ပေးမှုမှာ ဆော်ဒီတွင် ရှားပါးသည့် အဖြစ်အပျက်မျိုး ဖြစ်သည်။

ဆော်ဒီအစိုးရ၏ ခြစားမှုတိုက်ဖျက်ရေးအစီအစဉ်အရ လနှင့်ချီ ထိန်းသိမ်းခံခဲ့ရသည့် ဘီလီယံနာ စီးပွားရေးသမား တော်ဝင်မင်းသား တာရ်ကီ ဘင် တာလာလ်ကိုလည်း ဒုတိယ အုပ်ချုပ်ရေးမှူးရာထူး ခန့်အပ်ခဲ့သည်။

ထိုကဲ့သို့ ရာထူးအပြောင်းအလဲလုပ်မှု အကြောင်းအရင်းများကို ဆော်ဒီက တရားဝင် ထုတ်ပြန်ခြင်း မရှိသေးပေ။

အသက် ၃၂ နှစ်အရွယ် အိမ်ရှေ့မင်းသား မိုဟာမက် ဘင် ဆလ်မန် ဦးဆောင်သည့် ယဉ်ကျေးမှုနှင့် စီးပွားရေးဆိုင်ရာ အပြောင်းအလဲများကို ပြုပြင်ပြောင်းလဲမှုများ ပြုလုပ်နေချိန်တွင် ယခု ရာထူးအပြောင်းအလဲ ဖြစ်ပေါ်လာခြင်းဖြစ်သည်။

ယခုလုပ်ရပ်မှာ ယီမင်တွင် တိုက်ခိုက်မှုကြောင့် ဝေဖန်ခံရမှုနှင့် ပတ်သက်မည်ဟု ယူဆမှုများ ရှိနေပြီး၊ ဘုရင်ဆလ်မန်က သားဖြစ်သူ အိမ်ရှေ့မင်းသား မိုဟာမက် ဘင် ဆလ်မန် အာဏာရယူနိုင်ရန် လမ်းခင်းပေးနေခြင်းဖြစ်သည်ဟု ခန့်မှန်းမှုများလည်း ရှိနေသည်။

“ဒီအခြေအနေတွေက ကျွန်တော်တို့ကို တစ်ခု ပြောပြနေပါတယ်။ ဒါက ဘုရင်သစ် (မိုဟာမက် ဘင် ဆလ်မန်)ဟာ မကြာခင် လာတော့မယ် ဆိုတာပါ။ ဘုရင်ဆလ်မန်ဟာ သူ့သား အုပ်စိုးဖို့အတွက် ပလက်ဖောင်း ချပေးတာမျိုးဖြစ်ပြီး စီးပွားရေးမှာ သိသိသာသာ ပြောင်းလဲမှုတွေ၊ ခြစားမှု တိုက်ဖျက်ရေး စတာတွေကို ကျွန်တော်တို့ တွေ့မြင်နေရပါပြီ” ဟု အာရပ်ဒေသ နိုင်ငံရေးဆိုင်ရာ ပါမောက္ခ မဟ်ဂျူးဘ် ဇဝေရီက ပြောကြားခဲ့သည်။

Ref: Aljazeera