ကမ္ဘာ့ပထမဆုံး Virtual Reality ပန်းခြံ ဒူဘိုင်းတွင် ဖွင့်လှစ်မည်

မတ် ၁၊ ၂၀၁၈
M-Media

– ကမ္ဘာ့ ပထမဆုံး Virtual Reality ပန်းခြံကို ဒူဘိုင်းမှာ အခုနှစ် နှစ်လယ်ပိုင်းလောက်ကျရင် ဖွင့်လှစ်တော့မယ်လို့ သိရပါတယ်။

မကြုံစဖူး ဂိမ်းတွေ၊ အစီးအနင်းတွေအပါအ၀င် အသက်အရွယ်တိုင်းနဲ့ သင့်လျော်မယ့် အပန်းဖြေရေး၊ ဖျော်ဖြေရေးနည်းအစီအစဉ်တွေ ပါဝင်မယ့် အဲဒီ VR ပန်းခြံကို Dubai Mall မှာ ဖွင့်လှစ်မှာဖြစ်ကာ ဒေသတွင်း ဖျော်ဖြေမှုနယ်ပယ်ရဲ့ အနာဂတ်သစ် ဖြစ်လာမှာ ဖြစ်ပါတယ်။

ဒီပန်းခြံမှာ ပါဝင်မယ့် အစီအစဉ်တွေကို ကမ္ဘာ့ထိပ်တန်း Virtual Reality ကုမ္ပဏီတွေက ပူးပေါင်းဖန်တီးပေးထားတာဖြစ်ပြီး တစ်မူးထူးခြားတဲ့ ဖျော်ဖြေမှုတွေ၊ အပန်းဖြေမှုအတွေ့အကြုံတွေကို ခံစားရမှာဖြစ်တယ်လို့ VR Park ကို တည်ဆောက်ခဲ့တဲ့ Emaar Entertainment ကုမ္ပဏီက ပြောပါတယ်။

ဒီပန်းခြံထဲမှာ ဂိမ်းတွေ၊ အစီးအနင်းတွေ၊ လေ့လာရေးခရီးတွေ၊ အပြန်အလှန် ရင်ဆိုင်ရတဲ့ ဂိမ်းတွေ၊ ရိုလာကိုစတာတွေ အပါအ၀င် ကစားနည်းတွေ၊ အပန်းဖြေအစီအစဉ်တွေဟာ VR နဲ့ တကယ့် အတွေ့အကြုံတွေကို ပေါင်းစပ်ထားမှာ ဖြစ်ပါတယ်။

Emaar Entertainment ဟာ ပြီးခဲ့တဲ့နှစ်အတွင်း ဆန်းသစ်တဲ့ ရုပ်ရှင်ရုံတစ်ခုကို Dubai Mall မှာ ဖွင့်လှစ်ခဲ့ပြီး အခုနှစ်အတွင်းမှာလည်း မိသားစုတွေ ညစာစားရင်းနဲ့ ကြည့်ရှုနိုင်မယ့် ရုပ်ရှင်ရုံတစ်ခုကို ဖွင့်လှစ်ဖို့ ရှိနေပါတယ်။

Ref: Alarabiya