အမေရိကန်၏ စစ်ရေးလေ့ကျင့်မှုကို တုန့်ပြန်မည်ဟု မြောက်ကိုရီးယား ခြိမ်းခြောက်

မတ် ၃၊ ၂၀၁၈
M-Media

– အမေရိကန်အနေဖြင့် တောင်ကိုရီးယားနှင့် ပူးတွဲစစ်ရေးလေ့ကျင်မှု ဆောင်ရွက်ပါက မိမိတို့ကလည်း ပြန်လည်တုန့်ပြန်မည်ဖြစ်ပြီး ဆွေးနွေးမှုပြုလုပ်ရန် တောင်းပန်နေမည်မဟုတ်ဟု မြောက်ကိုရီးယားက ပြောကြားလိုက်သည်။

အမေရိကန်မှာ ဧပြီလဆန်းတွင် ပူးတွဲ စစ်ရေးလေ့ကျင့်မှု ပြုလုပ်မည်ဟု တောင်ကိုရီးယား သမ္မတ၏ လုံခြုံရေးအကြံပေးက ယခုသီတင်းပတ်အတွင်း ပြောကြားခဲ့သည်။ မြောက်ကိုရီးယားက အမေရိကန်နှင့် တောင်ကိုရီးယားတို့၏ ပူးတွဲစစ်ရေးလေ့ကျင့်မှုများကို ခြိမ်းခြောက်မှုတစ်ခုအဖြစ် ရှုမြင်ထားသည်။

“မြောက်ကိုရီးယားအပေါ် ပိတ်ဆို့မှုတွေ ဆက်လုပ်ထားပြီး အမေရိကန်က ပူးတွဲစစ်ရေးလေ့ကျင့်မှု လုပ်မယ်ဆိုရင် မြောက်ကိုရီးယားအနေနဲ့လည်း ကိုယ့်အစွမ်းအစနဲ့ တုန့်ပြန်သွားမှာပါ။ နောက်ဆက်တွဲကိစ္စတွေအားလုံးအတွက် အမေရိကန်က တာဝန်ယူရပါလိမ့်မယ်” ဟု မြောက်ကိုရီးယား နိုင်ငံပိုင်သတင်းဌာနက KCNA က ယနေ့တွင် ပြောကြားခဲ့ပြီး အဆိုပါ စစ်ရေးလေ့ကျင့်မှုများက ကိုရီးယားကျွန်းဆွယ် ပြန်လည်ရင်ကြားစေ့ရေး ကြိုးပမ်းမှုများကို ထိခိုက်စေမည်ဟုလည်း ပြောကြားခဲ့သည်။

မြောက်ကိုရီးယားအနေဖြင့် ၎င်းတို့၏ နျူနှင့် ဒုံးကျည်အစီအစဉ်ကို စွန့်လွှတ်စေရန် ဖိအားပေးသည့်အနေဖြင့် ပိတ်ဆို့မှုများ ထပ်မံပြုလုပ်သွားမည်ဟု အမေရိကန်က ဖေဖော်ဝါရီ ၂၃ ရက်နေ့တွက် ပြောကြားခဲ့သည်။ ဒေါ်နယ်ထရမ့်က ယခု ပိတ်ဆို့မှုများ အလုပ်မဖြစ်လျှင် အဆင့် ၂ ကို ဆောင်ရွက်သွားမည်ဖြစ်ပြီး ထိုအဆင့် ၂ က
ကမ္ဘာကြီးအတွက် အလွန်အမင်း ကံဆိုးစေမည်ဟု သတိပေးခဲ့သည်။

မြောက်ကိုရီးယားက ထရမ့်၏ တစ်ဖက်သတ်ပိတ်ဆို့မှုများကို ရှုတ်ချထားသည်။ သို့သော်လည်း အမေရိကန်နှင့် ဆွေးနွေးမှုများ ပြုလုပ်ရန် လမ်းဖွင့်ထားသည်ဟု ပြီးခဲ့သည့်လ အိုလံပစ်ပြိုင်ပွဲသို့ သွားရောက်ခဲ့သည့် မြောက်ကိုရီးယား အကြီးတန်းတာဝန်ရှိသူများက ပြောကြားခဲ့သည်။

အိမ်ဖြူတော်ကမူ မြောက်ကိုရီးယားနှင့် မည်သည့်ဆွေးနွေးမှုမျိုးမဆို နျူကလီးယားအစီအစဉ် ရပ်တန့်မှုဆီသို့ ဦးတည်မည်ဟု ပြောကြားခဲ့သည်။

Ref: CNA