တရုတ်၏ ရာသက်ပန်သမ္မတအစီအစဉ်မျိုး အမေရိကန်တွင်လုပ်မည်ဟု ထရမ့်ပြော

မတ် ၄၊ ၂၀၁၈
M-Media

– တရုတ်နိုင်ငံရဲ့ သမ္မတသက်တမ်း ကန့်သတ်မှု ပယ်ဖျက်မယ့် အစီအစဉ်ကို အမေရိကန်သမ္မတ ဒေါ်နယ်ထရမ့်က ထောက်ခံလိုက်ပြီး အမေရိကန်မှာလည်း တစ်နေ့နေ့ ဒီလိုဆောင်ရွက်သွားမယ်လို့ ပြောကြားခဲ့ပါတယ်။

ဖလော်ရီဒါပြည်နယ်က သူ့ရဲ့ အပန်းဖြေစခန်း Mar-a-Lago မှာ စနေနေ့က ပြုလုပ်တဲ့ ရန်ပုံငွေရှာဖွေပွဲတစ်ခုမှာ ထရမ့်က ဒီလို ပြောဆိုခဲ့တဲ့ အသံမှတ်တမ်းကို ကိုးကားပြီး CNN သတင်းဌာနက ဒီကနေ့မှာ ဖော်ပြခဲ့တာ ဖြစ်ပါတယ်။

“သူ(ရှီကျင့်ဖျင်)ဟာ ရာသက်ပန်သမ္မတ ဖြစ်သွားမှာပါ။ ကောင်းပါတယ်။ ဒီလိုဖြစ်အောင် သူလုပ်နိုင်ခဲ့တယ်။ ကောင်းတယ်လို့ ထင်ပါတယ်။ ကျွန်တော်တို့လည်း တစ်နေ့နေ့ ဒီလိုဖြစ်အောင် ကြိုးစားကောင်းကြိုးစားမှာပါ” လို့ ထရမ့်က ပြောကြားခဲ့တာပါ။

အခြေခံဥပဒေက သမ္မတနဲ့ ဒုတိယသမ္မတသက်တမ်းတွေ ကန့်သတ်ထားမှုကို ပယ်ဖျက်ဖို့အတွက် တရုတ်ကွန်မြူနစ်ပါတီရဲ့ ဗဟိုကော်မတီဟာ ဖေဖော်ဝါရီနှောင်းပိုင်းမှာ အဆိုပြုခဲ့ပြီး၊ သမ္မတ ရှီကျင့်ဖျင်ရဲ့ ပေါ်လစီကိုလည်း အခြေခံဥပဒေမှာ ထည့်သွင်းဖို့ တိုက်တွန်းခဲ့ပါတယ်။

ဒါဟာ ရှီကျင့်ဖျင် သမ္မတအဖြစ် အမြဲရှိနေဖို့အတွက် လမ်းဖွင့်ပေးလိုက်တာဖြစ်တယ်လို့ ဝေဖန်မှုတွေ ရှိနေပါတယ်။

တရုတ်ကွန်မြူနစ်ပါတီရဲ့ အာဘော်သတင်းစာက ဒီပြောကြားမှုကို ငြင်းဆိုခဲ့ပြီး ‘သမ္မသက်တမ်း ကန့်သတ်ထားမှုကို ပယ်ဖျက်ပေမယ့် ပါတီနဲ့ နိုင်ငံခေါင်းဆောင်အဖြစ်ကနေ အနားယူရတဲ့စနစ်ကို ပြောင်းလဲတာမျိုး မဟုတ်သလို၊ နိုင်ငံ့ခေါင်းဆောင်တွေ ရာသက်ပန်ရာထူးယူဖို့ ရည်ရွယ်တာမဟုတ်ဘူး’ လို့ ပြောကြားခဲ့ပါတယ်။

တရားဝင် ရေးသားအတည်ပြုထားမျိုးမဟုတ်ပေမယ့် တရုတ်နိုင်ငံရေးစနစ်မှာ အကြီးတန်းခေါင်းဆောင်တွေဟာ အသက် ၆၈ နှစ်အရွယ်ကိုရောက်ရင် အနားယူရလေ့ရှိပါတယ်။ သမ္မတရှီကျင့်ဖျင်ဟာ လက်ရှိမှာ အသက် ၆၄ နှစ် ရှိနေပါပြီ။

နိုင်ငံခြားရေးဝန်ကြီးဟောင်း ဟီလာရီကလင်တန်ရဲ့ အီးမေးလ်ပြဿနာအတွက် စုံစမ်းစစ်ဆေးဖို့ သူ့ရဲ့တိုက်တွန်းမှုကို မလုပ်ဆောင်တဲ့အတွက်လည်း Mar-a-Lago က ရန်ပုံငွေရှာဖွေပွဲမှာ ထရမ့်ဟာ ရှေ့နေချုပ် ဂျက်ဖ် ဆက်ရှင်ကို ဝေဖန်ခဲ့ပါတယ်။

Ref: CNN