အစ္စလာမ်၏ အလယ်အလတ်လမ်းစဉ်ကို ဗြိတိန်နှင့် ပူးပေါင်းမြှင့်တင်မည်ဟု ဆော်ဒီအိမ်ရှေ့မင်းသားပြော

မတ် ၆၊ ၂၀၁၈
M-Media

– ဆော်ဒီနဲ့ ဗြိတိန်တို့ရဲ့ ဆက်ဆံရေးဟာ ပိုမိုခိုင်မာလာပြီး အစ္စလာမ်သာသနာရဲ့ အလယ်အလတ်လမ်းစဉ်ကို မြှင့်တင်ဖို့ ပူးပေါင်းလုပ်ဆောင်သွားမယ်ဆိုရင် နှစ်နိုင်ငံ ပိုမို လုံခြုံမယ်လို့ ယုံကြည်ကြောင်း ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က ပြောကြားလိုက်ပါတယ်။

Telegraph သတင်းစာနဲ့ အင်တာဗျူးမှာ မင်းသားက အဲဒီလို ပြောကြားလိုက်တာဖြစ်ပြီး သူတို့နှစ်နိုင်ငံဟာ ကာကွယ်ရေးနဲ့ စီးပွားရေးမှာ သမိုင်းနဲ့ချီတဲ့ ဆက်ဆံရေးမျိုး ရှိတယ်လို့လည်း ဆိုပါတယ်။

“ဆော်ဒီနဲ့ ဗြိတိန်တို့ရဲ့ ဆက်ဆံရေးဟာ ဆော်ဒီနိုင်ငံ တည်ထောင်ကတည်းက သမိုင်းနဲ့ချီ ရှိခဲ့တာပါ။ အဲဒီလို စတင်ကတည်းက ဘုံအကျိုးစီးပွားကို ကျွန်တော်တို့ ရှေ့ရှုခဲ့ပြီး ဒီကနေ့ ကျွန်တော်တို့ရဲ့ ဆက်ဆံရေးဟာ ပိုပြီးတော့ ကောင်းလာပါတယ်”

နောက်ပြီး ဆော်ဒီနဲ့ ဆက်ဆံရေး ပိုမိုခိုင်မာမယ်ဆိုရင် ဗြိတိန်နဲ့ ဆော်ဒီပြည်သူတွေသာမက တစ်ကမ္ဘာလုံး ပိုပြီး အန္တရာယ်ကင်းလိမ့်မယ်လို့လည်း မင်းသားက ပြောကြားခဲ့ပါတယ်။

“အစွန်းရောက်တွေနဲ့ အကြမ်းဖက်သမားတွေ ချိတ်ဆက်ပြီး သူတို့ရဲ့ အယူအဆတွေကို ဖြန့်ဖြူးနေကြပါတယ်။ အစ္စလာမ်ရဲ့ အလယ်အလတ်လမ်းစဉ်ကို မြှင့်တင်ဖို့အတွက် ကျွန်တော်တို့ ပူးပေါင်းဆောင်ရွက်ဖို့ လိုပါတယ်”

အိမ်ရှေ့မင်းသား မိုဟာမက် ဘင် ဆလ်မန်ဟာ အခုတစ်ပတ်အတွင်း ဗြိတိန်ကို ၃ ရက်ကြာ သွားရောက်ဖို့ရှိနေပြီး ၀န်ကြီးချုပ် ထရီဇာမေ၊ အခြား အကြီးတန်းဝန်ကြီးတွေနဲ့ ဆွေးနွေးမှာဖြစ်သလို၊ ဗြိတိန်တော်ဝင်မိသားစုနဲ့လည်း တွေ့ဆုံဖို့ ရှိပါတယ်။

“ဆော်ဒီဟာ ကမ္ဘာစီးပွားရေးရဲ့ အစိတ်အပိုင်းတစ်ခု ဖြစ်ရမယ်လို့ ကျွန်တော်တို့ ယုံကြည်ပါတယ်။ လူတွေဟာ လွတ်လပ်စွာ သွားလာနိုင်ဖို့လိုတယ်။ ကျွန်တော်တို့ကလည်း ကျန်ကမ္ဘာကြီးနဲ့ တူညီတဲ့ စံနှုန်းမျိုး သတ်မှတ်ပေးဖို့ လိုပါတယ်”

မိုဟာမက် ဘင် ဆလ်မန်ဟာ ဆော်ဒီနိုင်ငံအတွင်းက စီးပွားရေး၊ ယဉ်ကျေးမှု ပြုပြင်ပြောင်းလဲရေးစီမံကိန်းကို ဦးဆောင်နေသူ ဖြစ်ပါတယ်။

ဗြိတိန်ကိုလည်ပတ်မှုအတွင်း မင်းသားဟာ ဗြိတိန်ထောက်လှမ်းရေးအဖွဲ့တွေရဲ့ ခေါင်းဆောင်တွေနဲ့ တွေ့ဆုံဖို့ရှိသလို ဗြိတိန် အမျိုးသားလုံခြုံရေးကောင်စီရဲ့ အစည်းအဝေးကို တက်ရောက်ဖို့လည်း ဖိတ်ကြားခံထားရပါတယ်။

တိုင်းတစ်ပါးက ဦးသျှောင်တစ်ဦးကို ဒီအစည်းအဝေး တက်ရောက်ခွင့်ပြုတာဟာ ဗြိတိန်ရဲ့ ရှားပါးတဲ့ ခွင့်ပြုမှုလည်း ဖြစ်ပါတယ်။

“အရှေ့အလယ်ပိုင်း တည်ငြိမ်မှုကို ကျွန်တော်တို့ လိုအပ်တာကြောင့် အကြမ်းဖက်ဝါဒ၊ အစွန်းရောက်ဝါဒတွေကို တိုက်ဖျက်ချင်ပါတယ်” လို့ မင်းသားက အင်တာဗျူးမှာ ပြောကြားခဲ့ပါတယ်။

Ref: Alarabiya