လုံခြုံရေးအာမခံလျှင် နျူစမ်းသပ်မှု ရပ်ပေးမည်ဟု မြောက်ကိုရီးယား ကတိပြု

မတ် ၆၊ ၂၀၁၈
M-Media

ချွန်အီယွန်နှင့် ကင်ဂျုံအန်တို့ တွေ့ဆုံစဉ်

– နိုင်ငံလုံခြုံရေးကို အာမခံပေးနိုင်လျှင် နျူလက်နက် စမ်းသပ်မှုကို ရပ်တန့်ပေးမည်ဟု မြောက်ကိုရီးယားက သဘောတူခဲ့ကြောင်း တောင်ကိုရီးယားအစိုးရ၏ အမျိုးသားလုံခြုံရေးအကြံပေးက ပြောကြားလိုက်သည်။

ယနေ့တွင်ပြုလုပ်သည့် သတင်းစာရှင်းလင်းပွဲ အကျဉ်းချုပ်တွင် ထိပ်တန်းအကြံပေး ချွန်အီယွန်က မြောက်ကို ရီးယားခေါင်းဆောင် ကင်ဂျုံအန်နှင့် တောင်ကိုရီးယားသမ္မတ မွန်ဂျယ်အင်တို့မှာ ဧပြီလတွင် သမိုင်းဝင် ထပ်သီးဆွေးနွေးပွဲ ပြုလုပ်မည်ဟုလည်း ထည့်သွင်းပြောဆိုခဲ့သည်။

ချွန်အီယွန်မှာ တောင်ကိုရီးယားကိုယ်စားလှယ်အဖွဲ့ကို ဦးဆောင်ကာ မြောက်ကိုရီးယားသို့ ၂ ရက်ကြာ သွားရောက်ခဲ့ပြီး ခေါင်းဆောင် ကင်ဂျုံအန်နှင့်လည်း တွေ့ဆုံခဲ့သည်။

တောင်ကိုရီးယား သတင်းဌာန Yonhap က ကိုရီးယားခေါင်းဆောင်နှစ်ဦးမှာ နှစ်နိုင်ငံနယ်စပ်ရှိ ပန်မူဂျွန်းဒေသတွင် တွေ့ဆုံမည်ဟု ဖော်ပြခဲ့သည်။

“ကိုရီးယားကျွန်းဆွယ် နျူကလီးယားကင်းစင်းရေး စိတ်ပိုင်းဖြတ်ထားတယ်ဆိုတာကို မြောက်ဖက်က ထပ်မံပြောကြားခဲ့ပြီး၊ ခေါင်းဆောင်တွေအတွက် လုံခြုံရေးကို အာမခံပေးနိုင်မယ်ဆိုရင်၊ မြောက်ကိုရီးယားအပေါ်ရှိနေတဲ့ စစ်ရေးခြိမ်းခြောက်မှုတွေကို ဖယ်ရှားပေးမယ်ဆိုရင် နျူလက်နက် ပိုင်ဆိုင်စရာ ဘာအကြောင်းမှမရှိဘူးလို့ ထည့်သွင်း ပြောဆိုခဲ့ပါတယ်” ဟု ချွန်အီယွန်က သတင်းစာရှင်းလင်းပွဲတွင် ပြောကြားခဲ့သည်။

နျူကင်းစင်ရေး၊ နှစ်နိုင်ငံဆက်ဆံရေး ပုံမှန်ပြန်ဖြစ်ရေး ကိစ္စများအတွက် အမေရိကန်နှင့် စစ်မှန်သည့် ဆွေးနွေး မှုမျိုး ပြုလုပ်ရန် စိတ်ဆန္ဒရှိကြောင်း၊ ထိုဆွေးနွေးမှု တိုးတက်လာသည့်နှင့်အမျှ နျူကလီးယား စမ်းသပ်မှုနှင့် ဒုံးကျည်ပစ်လွှတ်မှုများကို ရပ်တန့်ပေးမည်ဖြစ်ကြောင်း မြောက်ကိုရီးယားက ပြောကြားခဲ့သည်ဟုလည်း ချွန်အီယွန်က ဆိုသည်။

Ref: Aljazeera