အမျိုးသမီးတွေရဲ့ စွမ်းအားကို ထုတ်ပြလိုက်တဲ့ အီမရိတ်လေကြောင်းလိုင်း

မတ် ၇၊ ၂၀၁၈
M-Media

– မတ်လ ၈ ရက်နေ့မှာ ကျရောက်မယ့် နိုင်ငံတကာ အမျိုးသမီးများနေ့ကို ဂုဏ်ပြုတဲ့အနေနဲ့ အီမရိတ်လေကြောင်းလိုင်းဟာ အမျိုးသမီးတွေသာ စီစဉ်ပျံသန်းတဲ့ လေယာဉ်ခရီးစဉ် ဗီဒီယိုတစ်ခုကို လွှင့်တင်လိုက်ပါတယ်။

အာရပ်စော်ဘွားများပြည်ထောင်စု ဒူဘိုင်းကနေ အမေရိကန်ပြည်ထောင်စု ဆန်ဖရန်စ္စကိုမြို့ကို ပျံသန်းတဲ့ အဲဒီ Airbus A380 လေယာဉ်ကို အင်ဂျင်နီယာ၊ လေဆိပ်ပို့ဆောင်ရေး၊ စီမံခန့်ခွဲရေ၊ လုံခြုံရေး၊ ကုန်တင်ကုန်ချတွေ အပါအ၀င် ဌာနအားလုံးက အမျိုးသမီး စုစုပေါင်း ၇၅ ဦးက စီမံပြင်ဆင်ပေးတာ ဖြစ်ပါတယ်။

လေယာဉ်ကို ကနေဒါလေယာဉ်မှူး ပက်ထရီကာ ဘီရှော့ဖ်၊ ဗြိတိန်က လက်ထောက်လေယာဉ်မှူး ရေဘက်ကာ လောင်ဟိဒ်တို့က မောင်းနှင်ကာ လေယာဉ်အတွင်း ၀န်ဆောင်မှုကို ပိုလန်က ပါဆာ ၀ီရိုနီကာဦးဆောင်တဲ့ အဖွဲ့က တာဝန်ယူတာ ဖြစ်ပါတယ်။

လေယာဉ်ခရီးစဉ်ကို စီစဉ်တဲ့အမျိုးသမီးတွေဟာ နိုင်ငံပေါင်း ၂၅ နိုင်ငံကျော်ကဖြစ်ပြီး အီမရိတ်လေကြောင်းလိုင်းက သူတို့ကို Superwomen လို့ ဂုဏ်ပြုခေါ်ဝေါ်ခဲ့ပါတယ်။

အီမရိတ်လေကြောင်းလိုင်းက ၀န်ထမ်းတွေရဲ့ ၄၀ ရာခိုင်နှုန်းကျော်ဟာ အမျိုးသမီးတွေဖြစ်ပြီး အဲဒီအထဲက ၁၁၅၀ ဟာ ယူအေအီးနိုင်ငံသားတွေ ဖြစ်ကြပါတယ်။

Ref : Alarabiya