ဗြိတိန်သံအမတ်များ တစ်ပတ်အတွင်း ထွက်ခွာရမည်ဟု ရုရှား ရာဇသံပေး

မတ် ၁၇၊ ၂၀၁၈
M-Media

– ဗြိတိန်သံတမန် ၂၃ ယောက်ကို တိုင်းပြည်ကနေ နှင်ထုတ်သွားမယ်လို့ ရုရှားနိုင်ငံခြားရေးဝန်ကြီးဌာနက ဒီကနေ့မှာ ကြေငြာလိုက်ပြီး သူလျှိုဟောင်းတစ်ဦး အဆိပ်နဲ့ လုပ်ကြံခံရမှုအတွက် နှစ်နိုင်ငံအကြား တင်းမာမှု နောက်ဆက်တွဲ ဖြစ်ပါတယ်။

ယူကေထောက်လှမ်းရေးအတွက် အလုပ်လုပ်ပေးခဲ့တဲ့ သူလျှိုဟောင်း ရုရှားလူမျိုး ဆာဂျီ စကရီပဲလ်နဲ့ သူ့ရဲ့သမီးဖြစ်သူတို့ဟာ မတ်လ ၄ ရက်နေ့က ဓာတုအဆိပ်နဲ့ လုပ်ကြံခံခဲ့ရပြီး ဒါဟာ ရုရှားရဲ့ လက်ချက်ဖြစ်တယ်လို့ စွပ်စွဲကာ ယူကေက ရုရှားသံတမန် ၂၃ ဦးကို တစ်ပတ်အတွင်း တိုင်းပြည်ကထွက်သွားဖို့ အခုတစ်ပတ် အစောပိုင်းမှာ အမိန့်ပေးခဲ့ပါတယ်။

စကရီပဲလ်ဟာ ရုရှားထောက်လှမ်းရေးတွေကို သစ္စာဖောက်ကာ ဗြိတိန်ဖက်ကို သတင်းတွေပေးခဲ့ပြီး ၂၀၀၄ ခုနှစ်မှာ ရုရှားရဲ့ ဖမ်းဆီးခြင်းကို ခံခဲ့ရပါတယ်။ နောက်ပိုင်းမှာ နှစ်နိုင်ငံသူလျှိုတွေ အပြန်အလှန် လဲလှယ်မှုအတွင်း ဗြိတိန်ကို ပြန်ရောက်လာခဲ့ကာ အခြေချခဲ့ပါတယ်။

ရုရှားက နိုင်ငံအတွင်း ဗြိတိသျှသံအမတ်တွေဟာ တစ်ပတ်အတွင်း ထွက်ခွာရမယ်လို့ ရုရှားဆိုင်ရာ ဗြိတိန်သံအမတ်ကြီး လော်ရီ ဘရစ္စတိုးကို ဒီကနေ့မှာ ခေါ်ယူတွေ့ဆုံ ပြောကြားခဲ့ပါတယ်။

ဗြိတိသျှကောင်စီကို ပိတ်ပစ်ဖို့နဲ့ စိန့်ပီတာစဘတ်မှာ ကောင်စစ်ဝန်ရုံးဖွင့်လှစ်ရေး ခွင့်ပြုထားမှုကို ပြန်ရုပ်သိမ်းဖို့ ဆုံးဖြတ်ခဲ့တယ်လို့လည်း ရုရှားနိုင်ငံခြားရေး ၀န်ကြီးဌာနကရဲ့ ကြေငြာချက်မှာ ဖော်ပြထားပါတယ်။

Ref: Aljazeera