ယဉ်ကျေးမှုအနုပညာ တိုးတက်စေရန် ဆော်ဒီက ရုပ်ရှင်ကောင်စီ ဖွဲ့စည်း

မတ် ၂၁၊ ၂၀၁၈
M-Media

– ဆော်ဒီ ယဉ်ကျေးမှုဆိုင်ရာ အာဏာပိုင်အဖွဲ့ (GAC) က ဆော်ဒီရုပ်ရှင်ကောင်စီ ဖွဲ့စည်းလိုက်ကြောင်း မနေ့မှာ ကြေငြာခဲ့ပြီး ရုပ်ရှင်နဲ့ အနုပညာ ဆန်းသစ်မှုကဏ္ဍတွေမှာ ကူညီပံ့ပိုးပေးသွားဖို့ ဖြစ်တယ်လို့ ဆိုပါတယ်။

GAC ရဲ့ စီအီးအို အဟ်မဒ် အလ်-မာဇီဒ်က ဒီဆောင်ရွက်မှုကြောင့် တိုင်းပြည်ရဲ့ အသမိုင်းနဲ့ ယဉ်ကျေးမှုကဏ္ဍတွေကို ၂၀၃၀ ရည်မှန်းချက်အတိုင်း ပိုမိုမြှင့်တင်ပေးနိုင်ကာ နိုင်ငံရဲ့ စီးပွားရေးနဲ့ ဖွံ့ဖြိုးတိုးတက်မှုတွေကို အထောက်အကူဖြစ်စေမယ်လို့ ပြောကြားခဲ့ပါတယ်။

အသစ်ဖွဲ့စည်းလိုက်တဲ့ ဆော်ဒီ ရုပ်ရှင်ကောင်စီကို ရေရှည်တည်တံ့မယ့် မဟာဗျူဟာမြောက် နည်းလမ်းတွေကနေ ရုပ်ရှင်နဲ့ အနုပညာကဏ္ဍ ဖွံ့ဖြိုးလာစေမယ့် ၀န်းကျင်တစ်ခု ဖန်တီးပေးဖို့ ရည်ရွယ်တာဖြစ်ပါတယ်။

ပါရမီရှိတဲ့လူငယ်တွေကို ပြုစုပျိုးထောင်ပေးတာ၊ အခြေခံလိုအပ်ချက်တွေ ဖြည့်ဆည်းတာ၊ အဆင့်မြင့် နည်းပညာတွေ အသုံးပြုတာ စတဲ့ နည်းလမ်းတွေနဲ့ ရုပ်ရှင်လောက ဖွံ့ဖြိုးတိုးတက်အောင်၊ ဆော်ဒီရဲ့ ယဉ်ကျေးမှုအနုပညာကဏ္ဍ ဖွံ့ဖြိုးအောင် အာရုံစိုက်လုပ်ဆောင်သွားမယ်လို့လည်း အလ်-မာဇီဒ်က ထည့်သွင်းပြောဆိုခဲ့ပါတယ်။

အိမ်ရှေ့မင်းသား မိုဟာမက် ဘင် ဆလ်မန်ရဲ့ ဦးဆောင်မှုနဲ့ ဆော်ဒီဟာ နိုင်ငံအတွင်း လူမှုရေး၊ စီးပွားရေး ပြုပြင်ပြောင်းလဲမှုတွေကို အကြီးအကျယ် လုပ်ဆောင်နေပြီး အမျိုးသမီးတွေ ကားမမောင်းရဆိုတဲ့ ကန့်သတ်မှုကို ပယ်ဖျက်တာမျိုးတွေလည်း ဒီ ပြုပြင်ပြောင်းလဲမှုမှာ ပါဝင်ပါတယ်။

Ref: Alarabiya