ထရမ့်သားမက်ကို အိတ်ထဲထည့်ထားသည်ဟု ဆော်ဒီအိမ်ရှေ့မင်းသားပြော

မတ် ၂၂၊ ၂၀၁၈
M-Media

ထရမ့်သားမက် ဂျာရဒ် ကက်ရ်ှနာ (လယ်)

– အမေရိကန်သမ္မတ ဒေါ်နယ်ထရမ့်ရဲ့ သားမက်ဖြစ်ပြီး သူ့ရဲ့ အနီးကပ်အကြံပေးလည်းဖြစ်သူ ဂျာရဒ် ကက်ရ်ှနာဟာ သူ့ရဲ့အိတ်ကပ်ထဲကလူဖြစ်တယ်လို့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က ပြောကြားခဲ့ကြောင်း The Intercept သတင်းဌာနက ဖော်ပြပါတယ်။

သူ့အပေါ် သစ္စာမစောင့်သိသူတွေရဲ့ အသေးစိတ် စာရင်းတွေကို ကက်ရ်ှနာက သူ့ကို ပေးခဲ့တယ်ဆိုတဲ့ ဘင် ဆလ်မန်ရဲ့ ပြောကြားမှုကို ဆော်ဒီနဲ့ ယူအေအီး တော်ဝင်မိသားစုတွေနဲ့ နီးစပ်တဲ့ သတင်းရင်းမြစ်တွေကို ကိုးကားပြီး ထည့်သွင်းဖော်ပြခဲ့ပါတယ်။

အခြား ရင်းမြစ်တစ်ခုက ဘင် ဆလ်မန်က အဘူဒါဘီ အိမ်ရှေ့မင်းသား မိုဟာမက် ဘင် ဇေယဒ် အလ် နဟ်ယန်နဲ့ တွေ့ဆုံမှုအတွင်း ကက်ရ်ှနာဟာ သူ့ရဲ့ ‘သူ့အိတ်ကပ်ထဲကလူ’ ဆိုပြီး ပြောကြားခဲ့တယ်လို့ ဆိုပါတယ်။

ကက်ရ်ှနာရဲ့ ရှေ့နေတွေကတော့ ဒီသတင်းကို ငြင်းဆိုခဲ့ပြီး ‘မှားယွင်းကြောင်း၊ အဓိပ္ပါယ်မရှိကြောင်း’ တုန့်ပြန်ဖို့ မထိုက်တန်ကြောင်း ပြောဆိုခဲ့ပါတယ်။

အိမ်ရှေ့မင်းသား မိုဟာမက် ဘင် ဆလ်မန်ဟာ ခြစားမှုတိုက်ဖျက်ရေးခေါင်းစဉ်နဲ့ နိုဝင်ဘာလအတွင်းမှာ ဆော်ဒီတော်ဝင်မင်းသားတွေ၊ စီးပွားရေးသမားတွေနဲ့ အခြား အကြီးတန်းတာဝန်ရှိသူတွေကို ဖမ်းဆီးထိန်းသိမ်းခဲ့ပြီး၊ တစ်ချို့ကို ငွေကြေးအပေးအယူနဲ့ နောက်ပိုင်းမှာ ပြန်လွှတ်ပေးခဲ့ပါတယ်။

ထရမ့်ရဲ့ အနီးကပ်အကြံပေးဖြစ်တဲ့ ကက်ရ်ှနာဟာ အိမ်ဖြူတော်ကို ၀င်ရောက်ပြီး ထိပ်တန်းလျှို့ဝှက် ထောက်လှမ်းရေးအချက်အလက်တွေ ရယူခွင့်ကို ပြီးခဲ့တဲ့သီတင်းပတ်အနည်းငယ်အတွင်းမှာ ရုပ်သိမ်းခံခဲ့ရပါတယ်။

ယူအေအီး၊ တရုတ်၊ အစ္စရေးနဲ့ မက္ကဆီကိုတို့ရဲ့ တာဝန်ရှိသူတွေက ကက်ရ်ှနာကို အသုံးချပြီး အမြတ်ထုတ်နိုင်မယ့် နည်းလမ်းတွေကို ဆွေးနွေးခဲ့ကြတယ်လို့လည်း ၀ါရှန်တန်ပို့စ်သတင်းဌာနက ဖော်ပြခဲ့ဖူးပါတယ်။

ကက်ရ်ှနာနဲ့ ဆော်ဒီအိမ်ရှေ့မင်းသားတို့ဟာ ထရမ့် သမ္မတဖြစ်လာကတည်းက နီးကပ်တဲ့ ဆက်ဆံရေးရှိခဲ့ပြီး အောက်တိုဘာလက ကက်ရ်ှနာ ဆော်ဒီကို သွားရောက်စဉ်အတွင်းမှာ သူတို့နှစ်ဦး အစောဆုံး တွေ့ဆုံခဲ့ကြတယ်လို့ သတင်းတွေလည်း ထွက်ခဲ့ပါတယ်။

ဆော်ဒီ အိမ်ရှေ့မင်းသား မိုဟာမက် ဘင် ဆလ်မန်ဟာ လက်ရှိမှာ အမေရိကန်ကို ၂ ပတ်ကြာခရီးအဖြစ် ရောက်ရှိနေပါတယ်။

Ref: Aljazeera