ပြင်သစ်သမ္မတဟောင်း ဆာကိုဇီ ခြစားမှု၊ ငွေကြေးမသမာမှုများဖြင့် တရားစွဲခံရ

မတ် ၂၂၊ ၂၀၁၈
M-Media

ဆာကိုဇီ သမ္မတအဖြစ် ရွေးကောက်ခံရပြီးနောက် ပဲရစ်တွင် ကဒါဖီနှင့် တွေ့ဆုံမှု

– ၂၀၀၇ ခုနှစ် မဲဆွယ်ရေးလုပ်ငန်းတွင် ထိုစဉ်က လစ်ဗျားခေါင်းဆောင် မွမ်မာ ကဒါဖီထံမှ ငွေကြေးများ ရယူခဲ့သည့်အတွက် ထိန်းသိမ်းခံထားရသည့် ပြင်သစ်သမ္မတဟောင်း ဆာကိုဇီမှာ ခြစားမှုနှင့် တရားမ၀င် ငွေကြေးရယူခဲ့မှုများဖြင် ယနေ့တွင် တရားစွဲဆိုခံခဲ့ရသည်။

ထိုကိစ္စနှင့်ပတ်သက်၍ ၅ နှစ်တာ စုံစမ်းစစ်ဆေးမှုနှင့် ဆာကိုဇီအား ၂ ရက်ကြာ စစ်ဆေးခဲ့ပြီးနောက် တရားသူကြီးများက လုံလောက်သည့်အထောက်အထားများကို ရရှိခဲ့သည်ဟု ဆုံးဖြတ်ကာ ယခုကဲ့သို့ တရားစွဲဆိုခဲ့ခြင်းဖြစ်သည်။

အသက် ၆၃ နှစ်အရွယ် ဆာကိုဇီမှာ ၂၀၀၇ ခုနှစ်မှ ၂၀၁၂ ခုနှစ်အထိ သမ္မတာဝန်ကို ထမ်းဆောင်ခဲ့သူဖြစ်သည်။

တရားစွဲဆိုမှုများကို ပြန်ရုပ်သိမ်းရေး အယူခံလျှောက်ထားရန် ဆာကိုဇီမှာ ၆ လ အချိန်ရမည်ဖြစ်ပြီး ထို့နောက် ကြားနာမှုများ ပြုလုပ်သင့်လားဆိုသည်ကို တရားသူကြီးများက ပြန်လည်ဆုံးဖြတ်မည်ဖြစ်သည်။

၂၀၀၇ ခုနှစ် ရွေးကောက်ပွဲ အောင်နိုင်ရေးအတွက် လစ်ဗျားခေါင်းဆောင်ဟောင်း ကဒါဖီထံမှ ငွေကြေးများ ရယူခဲ့သည်ဆိုသော စွပ်စွဲမှုများကို ဆာကိုဇီက ငြင်းဆိုထားသည်။

တရားစွဲဆိုမှုတွင် ဆာကိုဇီမှာ အဆိုပါ မဲဆွယ်မှုအတွင်း သတ်မှတ်ထားသည့် ငွေပမာဏ ၂၄ သန်းထက် ၂ ဆ အသုံးပြုခဲ့ပြီး စာရင်းများကို လိမ်လည်ပြဆိုခဲ့သည်ဟု ဖော်ပြထားသည်။

ပြင်သစ် စီးပွားရေးလုပ်ငန်းရှင်တစ်ဦးဖြစ်သူ ဇိုကဒ် တာကီဒင်းက ၎င်းအနေဖြင့် လစ်ဗျားမှ ငွေသား ကန်ဒေါ်လာ ၆ သန်းကို လစ်ဗျားမှ ဆာကိုဇီနှင့် ၎င်း၏ အရာရှိချုပ်ထံ လွှဲပြောင်းပေးခဲ့သည်ဟု ၂၀၁၆ ခုနှစ်တွင် စုံစမ်းဖော်မှု ၀ဘ်ဆိုက်တစ်ခုဖြစ်သည့် Mediapart သို့ ပြောကြားခဲ့သည်။

Ref: Aljazeera