ဆိုလ်းမြို့တွင် မွတ်စလင်များအတွက် ၀တ်ပြုဆောင်များ ထပ်မံတည်ဆောက်မည်

မတ် ၂၃၊ ၂၀၁၈
M-Media

ဆိုလ်းမြို့ရှိ ဂျာမေဗလီဝတ်ကျောင်းတော်

– မွတ်စလင်နိုင်ငံတွေက လာရောက်တဲ့ ခရီးသည်တွေ များလာတာကြောင့် ဆိုလ်းမြို့မှာ ၀တ်ပြုခန်းတွေ ပိုမို တည်ဆောက်ဖို့ စီစဉ်နေတယ်လို့ ဆိုလ်းမြို့အစိုးရက ပြီးခဲ့တဲ့တစ်ပတ်မှာ ကြေငြာခဲ့ပြီး မေလအတွင်း အဆင်သင့်ဖြစ်မယ်လို့ ဆိုပါတယ်။

ကမ္ဘာလှည့်ခရီးသွားတွေ လူကြိုက်များတဲ့ နေရာတွေမှာ ၀တ်ပြုဆောင် ၃ ခု ဆောက်လုပ်ဖို့အတွက် ၀မ် သန်း ၂၀၀ သုံးစွဲဖို့ ဆိုးလ်အစိုးရက စီစဉ်ထားပြီး အရှေ့တောင်အာရှနဲ့ အရှေ့အလယ်ပိုင်းက ကမ္ဘာလှည့်ခရီးသွားတွေကို ပိုမိုစွဲဆောင်နိုင်ဖို့ ရည်ရွယ်တာဖြစ်ပါတယ်။

ကိုရီးယား ခရီးသွားလာရေးအဖွဲ့ KTO က ၂၀၁၆ ခုနှစ်အတွင်း အရှေ့တောင်အာရှနဲ့ အရှေ့အလယ်ပိုင်းက ခရီးသွား စုစုပေါင်း ၉၈၅၈၅၈ ဦး ရှိခဲ့ပြီး ၂၀၁၅ ခုနှစ်ကထက် ၃၃ ရာခိုင်နှုန်း မြင့်တက်လာတယ်လို့ ဆိုပါတယ်။

၂၀၁၄ ခုနှစ်ကနေစလို့ ကိုရီးယားကိုလာရောက်တဲ့ မွတ်စလင်ခရီးသွားအရေအတွက် မြင့်တက်လာတာဖြစ်ပါတယ်။

ကိုရီးယားနိုင်ငံတစ်ဝှမ်းမှာ အစ္စလာမ်ဘာသာရေးဆိုင်ရာ ၀တ်ပြုရာနေရာဟာ ၇၈ ခုသာရှိပြီး များသောအားဖြင့် ဗလီဝတ်ကျောင်းတော်တွေ၊ တက္ကသိုလ်နဲ့ ဆေးရုံက ၀တ်ပြုခန်းတွေ ဖြစ်ပါတယ်။

ဆိုးလ်မြို့မှာ မွတ်စလင်တွေအတွက် ၀တ်ပြုရာနေရာ ၁၄ ခုသာရှိပြီး ဗလီဝတ်ကျောင်းတော်တွေကို ဖယ်လိုက်ရင် ကမ္ဘာလှည့်ခရီးသွားတွေ အသုံးပြုနိုင်မယ့် ၀တ်ပြုဆောင်က ၃ ခု၊ တက္ကသိုလ်ဝတ်ပြုဆောင် ၄ ခုနဲ့ ဆေးရုံဝတ်ပြုဆောင် ၆ ခုသာ ရှိပါတယ်။

ဆိုးလ်အစိုးရဟာ နိုင်ငံအတွင်းက မွတ်စလင်တွေ၊ အစ္စလာမ့်ဓမ္မပညာရှင်တွေထံကနေ အကြံအဉာဏ်ရယူခဲ့ပြီး မြို့ထဲမှာရှိနေတဲ့ ခရီးသွားသတင်းအချက်အလက်စင်တာမှာ ၀တ်ပြုခန်းတွေ ဖန်တီးပေးဖို့ စီစဉ်ထားပြီး အမျိုးသား၊ အမျိုးသမီးတွေအတွက် သီးသန့်ခန်းတွေ သတ်မှတ်ပေးထားမှာဖြစ်သလို ကုရ်အာန်ကျမ်းစာတွေကိုလည်း ထားပေးမှာ ဖြစ်ပါတယ်။

Ref: Korea Times