ယီမင်သူပုန်အဖွဲ့က ဒုံးကျည်ဖြင့်တိုက်ခိုက်မှုကြောင့် ဆော်ဒီတွင် လူတစ်ဦးသေဆုံး

မတ် ၂၆၊ ၂၀၁၈
M-Media

ဒုံးကျည်များအား ဆော်ဒီက ကြားဖြတ်ဟန့်တားမှုမြင်ကွင်း

– ယီမင်ရှိ ဟူသီသူပုန်များက ပစ်ခတ်သည့် ဒုံးကျည်အများအပြားကို ကြားဖြတ် ဟန့်တားခဲ့ရသည်ဟု ဆော်ဒီက ယနေ့တွင် သတင်းထုတ်ပြန်ခဲ့ပြီး တိုက်ခိုက်မှုကြောင့် သေဆုံးမှုလည်း ရှိခဲ့သည်။

ဆော်ဒီဦးဆောင်သည့် မဟာမိတ်အဖွဲ့၏ ပြောရေးဆိုခွင့်ရှိသူ ကာနယ် တာရ်ကီ အလ်-မာလီကီက ဆော်ဒီ လေကြောင်းကာကွယ်ရေးစနစ်မှာ ဒုံးကျည် ၇ လုံးကို ကြားဖြတ် ဟန့်တားခဲ့ရပြီး ထိုအထဲမှ ၃ လုံးမှာ မြို့တော် ရီယာ့ဒ်ကို ဦးတည်ခြင်းဖြစ်သည်ဟု ပြောကြားခဲ့သည်။

ထို့ပြင် ဗုံးဆံ အစအနများကြောင့် အီဂျစ်နိုင်ငံသားတစ်ဦး သေဆုံးခဲ့သည်ဟုလည်း ဆိုသည်။ လွန်ခဲ့သည့် ၃ နှစ် ဆော်ဒီက ယီမင်ပြည်တွင်းစစ်တွင် ပါဝင်ခဲ့ပြီးနောက်ပိုင်း ဟူသီသူပုန်များ၏ တိုက်ခိုက်မှုကြောင့် ရီယာ့ဒ်တွင် ပထမဆုံး သေဆုံးမှု ဖြစ်သည်။ ယခင်က ဒုံးကျည်ဖြင့် တိုက်ခိုက်မှုများတွင် ဒဏ်ရာရသူ အများအပြား ရှိခဲ့သည်။

ဟူသီသူပုန်များက ထုတ်လွှင့်သော Al Masirah ရုပ်သံက ဟူသီသူပုန်များမှာ ဆော်ဒီနိုင်ငံတောင်ပိုင်း အဘ်ဟာမြို့ရှိ လေဆိပ်များသို့ ဒုံးကျည်များဖြင့် ပစ်ခတ်ခဲ့သည်ဟု ဖော်ပြခဲ့သည်။

ဟူသီအဖွဲ့၏ ပြောရေးဆိုခွင့်ရှိသူ မိုဟာမက် အလ်-ဘူခိုင်တီက ယခုတိုက်ခိုက်မှုမှာ ဆော်ဒီက ယီမင်မြို့များနှင့်ြ ပည်သူများအပေါ် ဗုံးကြဲမှုအား တုန့်ပြန်ခြင်းဖြစ်သည်ဟု ပြောကြားခဲ့သည်။

တနင်္ဂနွေနေ့ အစောပိုင်းတွင် ဟူသီသူပုန်ခေါင်းဆောင် အဘ်ဒူလ် မာလစ် အလ်-ဟူသီက ၎င်းတို့အနေဖြင့် တာဝေးပစ် လက်နက်များကို အသုံးပြုကာ၊ တိုက်ခိုက်ရေးသမားအသစ်များကိုလည်း ပိုမိုစုဆောင်းသွားမည်ဟု ပြောကြားခဲ့သည်။

Ref: Aljazeera