ဗလီမီးရှို့မည်ဟု ဆိုရှယ်မီဒီယာတွင် ခြိမ်းခြောက်သူကို အမေရိကန်က ထောင် ၅ နှစ်ချ

မတ် ၃၀၊ ၂၀၁၈
M-Media

– ဗလီတွေကို မီးရှို့မယ်လို့ ဆိုရှယ်မီဒီယာကနေတစ်ဆင့် ခြိမ်းခြောက်သူကို အမေရိကန်က ဗုဒ္ဓဟူးနေ့မှာ ထောင်ဒဏ် ၅ နှစ် ချမှတ်လိုက်ပါတယ်။

မြောက်ကယ်ရိုလိုင်းနားပြည်နယ် ၀ီလ်မင်တန်မြို့က ပက်ထရစ် ကီယိုဂန်ဆိုသူဖြစ်ပြီး ဗလီတွေကို မီးရှို့ဖို့ခြိမ်းခြောက်မှု၊ ကလေးညစ်ညမ်းဇာတ်ကားတွေကို လက်ဝယ်ထားရှိမှု၊ လက်နက်ခဲယမ်းတွေ ကိုင်ဆောင်ထားမှုတွေနဲ့ တရားစွဲဆို ထောင်ချခံရတာဖြစ်ပါတယ်။

ထောင်ကထွက်လာရင် သူ့ကို စောင့်ကြည့်ဖို့ လိင်ကျူးလွန်သူအဖြစ် မှတ်တမ်းတင်ထားဖို့လည်း အမိန့်ချမှတ်မှုမှာ ပါဝင်ပါတယ်။

၂၀၁၅ ခုနှစ် နိုဝင်ဘာ ၁၃ ရက်နေ့က ပဲရစ်မြို့ အကြမ်းဖက်တိုက်ခိုက်မှုအပြီးမှာ ကီယိုဂန်ဟာ ဘော်စတွန်မွတ်စလင်အသိုင်းအ၀ိုင်း ယဉ်ကျေးမှုစင်တာရဲ့ Facebook စာမျက်နှာမှာ မီးလောင်နေတဲ့ ဗလီပုံတစ်ခုကို တင်ခဲ့ပြီး ‘ကိုယ့်နေရာက ဗလီတွေကို မီးရှို့ကြ’ လို့ ရေးသားခဲ့ပါတယ်။

ဒါတင် မကသေးဘဲ ‘ဟယ်လို ကလိမ်ကကျစ်တွေ’ ဆိုတဲ့စာသားကို ရေးသားခဲ့သလို၊ နောက်သ်အီစတန်းတက္ကသိုလ် အစ္စလာမ်အသင်းရဲ့ Facebook စာမျက်နှာမှာလည်း မီးလောင်နေတဲ့ဗလီပုံကို လွှင့်တင်ခဲ့ပါတယ်။

ပြစ်မှုကျူးလွန်သူ ကီယိုဂန်

ကီယိုဂန်ရဲ့ Facebook အကောင့်ကို စစ်ဆေးဖို့ ၀ရမ်းအရ ဖက်ဒရယ်တာဝန်ရှိသူတွေက ရှာဖွေရာမှာ ၂၀၁၃ နှစ်ကတည်းက ဗလီတွေကို မီးရှို့ရေး တိုက်တွန်းတဲ့ပို့စ်တွေကို တွေ့ခဲ့ရပါတယ်။

သူဟာ အရင်က ရာဇ၀တ်မှုကို နှစ်ကြိမ်ကျူးလွန်ခဲ့ဖူးသူပါ။

၂၀၁၆ ခုနှစ် ဇူလိုင်လမှာ ကီယိုဂန်ကို ၀ီလ်မင်တန်မြို့မှာ ရဲတပ်ဖွဲ့က ဖမ်းဆီးခဲ့ပြီး တရားစွဲဆိုခဲ့ကာ ၂၀၁၇ ခုနှစ် ဖေဖော်ဝါရီလ ဘော်စတွန်က ခရိုင်တရားရုံးမှာ သူက အခြားသူတွေကို ထိခိုက်နာကျင်စေဖို့၊ ခြောက်လှန့်ဖို့၊ အဆောက်အဦးတစ်ခုကို မီးနဲ့ ဖျက်ဆီးဖို့ ခြိမ်းခြောက်မှု၊ ကလေးညစ်ညမ်းဇာတ်ကားတွေ၊ လက်နက်ခဲယမ်းတွေ လက်ဝယ်ထားရှိမှုနဲ့ အပြစ်ရှိကြောင်း ၀န်ခံခဲ့ပါတယ်။

သူ့ကိုဖမ်းဆီးတဲ့အချိန် သူ့အိမ်မှာ စက်သေနတ်တွေ၊ ချေမှုန်းရေး ရိုင်ဖယ်တွေ၊ စနိုက်ပါတွေ၊ လက်နက်ခဲယမ်းတွေ တော်တော်များများ တွေ့ခဲ့ရပါတယ်။

Ref: lowellsun.com