ပြည်သူ ၁၄ ဦးကို အစ္စရေးက သတ်ဖြတ်ခဲ့ပြီးနောက် နိုင်ငံတော်ဝမ်းနည်းဖွယ်နေ့အဖြစ် ပါလက်စတိုင်းကြေငြာ

မတ် ၃၁၊ ၂၀၁၈
M-Media

ဒဏ်ရာရသူများကို သယ်ဆောင်သွားစဉ်

– ဂါဇာနယ်စပ်မှာ ချီတက်ဆန္ဒပြကြတဲ့ ပါလက်စတိုင်းပြည်သူတွေကို အစ္စရေးက ပစ်သတ်မှုကြောင့် ၁၄ ဦး သေဆုံးခဲ့ပြီးတဲ့နောက် ပါလက်စတိုင်းအာဏာပိုင်တွေက ဒီကနေ့ (စနေနေ့) ကို နိုင်ငံတော် ၀မ်းနည်းဖွယ်နေ့အဖြစ် ကြေငြာလိုက်ပါတယ်။

၄၂ နှစ်မြောက် Land Day အောက်မေ့ဖွယ်အဖြစ် မနေ့က ချီတက်ဆန္ဒပြမှုမှာ အစ္စရေးတပ်ဖွဲ့တွေက ပစ်ခတ်ခဲ့တာဖြစ်ပြီး ဒဏ်ရာရသူ ၁၄၀၀ ကျော်လောက်ရှိတယ်လို့ ပါလက်စတိုင်း ကျန်းမာရေးဝန်ကြီးဌာနက သတင်းထုတ်ပြန်ပါတယ်။

“အာဇာနည်တွေရဲ့ စွန့်လွှတ်စတေးမှုအတွက် နိုင်ငံတော် ၀မ်းနည်းဖွယ်နေ့အဖြစ် ကြေငြာဖို့ သမ္မတ မဟ်မူးဒ်အဘတ်စ်ရဲ့ ဆုံးဖြတ်ချက်အရ နိုင်ငံတစ်ဝှမ်းက စာသင်ကျောင်းတွေ၊ တက္ကသိုလ်တွေနဲ့ အစိုးရရုံးတွေအားလုံး စနေနေ့မှာ ပိတ်ထားမှာဖြစ်ပါတယ်” လို့ မနေ့က ထုတ်ပြန်တဲ့ ပါလက်စတိုင်းအစိုးရရဲ့ ကြေငြာချက်မှာ ဖော်ပြထားပါတယ်။

၁၉၇၆ ခုနှစ် မတ်လ ၃၀ ရက်နေ့မှာ ပါလက်စတိုင်းတွေပိုင်ဆိုင်တဲ့ လယ်ယာမြေတွေ တော်တော်များများကို အစ္စရေးက သိမ်းယူခဲ့မှုအတွက် မကျေမနပ်ဆန္ဒပြရာမှာ လက်နက်မဲ့ ပါလက်စတိုင်း ၆ ဦး အစ္စရေးရဲ့ သတ်ဖြတ်ခြင်းခံရမှုကို အမှတ်ရတဲ့အနေနဲ့ Land Day ကို နှစ်စဉ် ကျင်းပတာ ဖြစ်ပါတယ်။

မနေ့က ချီတက်မှုကို Great Return March လို့ စီစဉ်သူတွေက အမည်ပေးခဲ့ပြီး ပါလက်စတိုင်းဒုက္ခသည်တွေ နေရပ်ပြန်ခွင့်ရရေး ဆော်သြဖို့ဖြစ်တယ်လို့ ပြောကြားခဲ့ပါတယ်။

ဂါဇာမှာနေထိုင်သူတွေရဲ့ ၇၀ ရာခိုင်နှုန်းလောက်က ၁၉၄၈ ခုနှစ် အစ္စရေးက ပါလက်စတိုင်းတွေရဲ့ ပိုင်နက်တွေကို အကြမ်းဖက်သိမ်းပိုက်ချိန်မှာ ထွက်ပြေးခဲ့ရတဲ့ မိသားစုတွေကနေ ဆင်းသက်လာတာ ဖြစ်ပါတယ်။

မနေ့က ဆန္ဒပြမှုကို ဂါဇာ-အစ္စရေး နယ်စပ်တစ်လျှောက် နေရာ ၅ နေရာမှာ ပြုလုပ်ခဲ့ပြီး ဒဏ်ရာရသူအများစုဟာ ကျည်အစည်၊ ရာဘာကျည်တွေနဲ့ ပစ်ခတ်ခံရတာ၊ မျက်ရည်ဗုံးအငွေ့ ရှုမိတာတွေကြောင့်ဖြစ်တ်လို့ ပါလက်စတိုင်း ကျန်းမာရေးဝန်ကြီးဌာနက ပြောကြားခဲ့ပါတယ်။

Ref : Aljazeera