နိုင်ငံ ၂၀ ကျော်မှ သံတမန် ၆၀ နီးပါးကို ရုရှားနှင်ထုတ်

မတ် ၃၁၊ ၂၀၁၈
M-Media

– ရုရှားမှာ ယမန်နေ့က နိုင်ငံပေါင်း ၂၃ နိုင်ငံမှ သံသတမန် ၅၉ ဦးကို တိုင်းပြည်မှ နှင်ထုတ်ခဲ့ပြီး ဗြိတိန်တွင် ရုရှားသူလျှိုဟောင်းနှင့် ၎င်း၏ သမီးဖြစ်သူတို့ အဆိပ်ဖြင့် လုပ်ကြံခံရမှုကြောင့် မြင့်တက်လာသည့် တင်းမာမှု နောက်ဆက်တွဲရလဒ်ဖြစ်သည်။

ရုရှား၏ ယခုနှင်ထုတ်မှုမှာ ဥရောပနိုင်ငံများက ယူကေဘက်မှ ရပ်တည်ကာ ရုရှားသံတမန်များအား နှင်ထုတ်မှုကို တုန့်ပြန်ခြင်းဖြစ်သည်။

ကြာသာပတေးနေ့က ရုရှားမှာ အမေရိကန်သံတမန် ၆၀ ကို တိုင်းပြည်မှ ထွက်ခွာသွားရန် အမိန့်ပေးခဲ့သည်။ ထို့ပြင် စိန့် ပီတာစဘတ်ရှိ အမေရိကန် ကောင်စစ်ရုံး ဖွင့်လှစ်ခွင့်ပါမစ်ကိုလည်း ရုပ်သိမ်းခဲ့သည်။

ရုရှားလူမျိုး ဗြိတိန်သူလျှိုဟောင်း စကရီပဲလ်နှင့် သမီးဖြစ်သူတို့မှာ မတ်လအစောပိုင်းမှာ ယူကေတွင် ဓာတုအဆိပ်ဖြင့် လုပ်ကြံခံခဲ့ရပြီး ယူကေက ထိုလုပ်ရပ်မှာ ရုရှား၏လက်ချက်ဖြစ်သည်ဟု စွပ်စွဲကာ ရုရှားသံတမန်များကိုလည်း တိုင်းပြည်မှ နှင်ထုတ်ခဲ့သည်။

ထို့ပြင် အမေရိကန်၊ ကနေဒါနှင့် သြစတေးလျတို့မှာ ဥရောပ ၂၅ နိုင်ငံနှင့်အတူ ပူးပါင်း​၍ ပြီးခဲ့သည့်ရက်ပိုင်းအတွင်း ရုရှားသံတမန်များကို တိုင်းပြည်မှ နှင်ထုတ်ကာ ယူကေဖက်မှ ရပ်တည်ကြောင်း ပြသခဲ့သည်။

နေတိုးအဖွဲ့ကလည်း ရုရှားရှိ ၎င်းတို့၏ ကိုယ်စားလှယ်များကို ပြန်ခ်ါခဲ့သည်။

Ref: Aljazeera