ရှားပါးတောဆိတ်ကို အမဲလိုက်မှုအတွက် ဘောလီးဝုဒ်မင်းသား ထောင် ၅ နှစ်ချ

ဧပြီ ၆၊ ၂၀၁၈
M-Media

တရားရုံးမှထွက်လာသည့် ဆလ်မန်းခန်း

– ရှားပါးသော တောဆိတ်တစ်မျိုးအား ၁၉၉၈ ခုနှစ်တွင် အမဲလိုက်ခဲ့မှုဖြင့် ဘောလီးဝုဒ် နာမည်ကြီးမင်းသား ဆလ်မန်းခန်းကို အိန္ဒိယတရားရုံးတစ်ခုက ယမန်နေ့တွင် ထောင်ဒဏ် ၅ နှစ် ချမှတ်လိုက်သည်ဟု သိရသည်။

ရာဂျာစတန်ပြည်နယ်တွင် ရုပ်ရှင်ရိုက်ကူးစဉ် ဆလ်မန်းခန်းမှာ နိုင်ငံတော်မှ ကာကွယ်စောင့်ရှောက်ထားသည့် တောဆိတ် ၂ ကောင်အား အမဲလိုက်သတ်ဖြတ်ခဲ့ခြင်းဖြစ်သည်။ ထောင်ဒဏ်အပြင် ဒဏ်ငွေ ရူပီး တစ်သောင်း (ကန် ၁၅၄ ဒေါ်လာ) လည်း ပေးဆောင်ရမည်။

ထိုအမှုအတွက် ဆလ်မန်းခန်းနှင့်အတူ တရားစွဲဆိုခံခဲ့ရသည့် အခြား သရုပ်ဆောင် ၄ ဦးမှာ တရားသေ လွတ်မြောက်သွားခဲ့သည်။

အသက် ၅၂ အရွယ် ခန်းမှာ ယခုပြစ်ဒဏ်အတွက် အယူခံလျှောက်ထားနိုင်မည်ဖြစ်သည်။

ယခုအမှုမှာ သားကောင်များအား အမဲလိုက်မှုအတွက် ဆလ်မန်းခန်း၏ ၄ ခုမြောက်အမှုဖြစ်ပြီး ၂၀၀၆ ခုနှစ်တွင် အမဲလိုက်မှုနှစ်ခုအတွက် ထောင်ဒဏ် ၁ နှစ်နှင့် ၅ နှစ် သီးခြားစီ ချမှတ်ခံခဲ့ရသည်။ သို့သော်လည်း ၂၀၀၇ ခုနှစ်တွင် ရာဂျာစတန် တရားရုံးချုပ်က ပြစ်ဒဏ်ကို ဆိုင်းငံ့ခဲ့ပြီး နောက်ပိုင်းတွင် ပယ်ဖျက်ပေးခဲ့သည်။

၁၉၉၈ ခုနှစ်က အမဲလိုက်မှုတစ်ခုတွင် လိုင်စင်မရှိသော လက်နက်များ ကိုင်ဆောင်မှုအတွက်လည်း ဆလ်မန်းခန်းမှာ တရားစွဲဆိုခံခဲ့ရပြီး ၂၀၁၇ ခုနှစ်တွင် တရားသေ လွတ်မြောက်ခဲ့သည်။

Ref: BBC